Мәет юу тәртибе. Ничә тапкыр юарга? Суын нишләтергә?

Үлемгә әзерлек, мәет озату турында рухи остаз, ислам һәм гарәп теле нигезләре мөгаллиме Артур хәзрәт ГАБДУЛЛИН белән сөйләштек.

Мәет юу тәртибе нинди? Ничә мәртәбә юасы?

 – Мәетне мәҗбүри рәвештә башта бер тапкыр юабыз. Мәетнең хәле нинди булуына карап, 3, 5, 7 һәм аннан да күбрәк тә юарга мөмкин. Озаграк хасталанып яткан тәннәр булуы ихтимал бит.

Мәетне җылымса су белән юарга кирәк. «Мәетне юасы су чишмәдән алынырга тиеш», «краннан, коедан алмагыз», «су кояш астында җылынган булырга тиеш түгел» дигән сүзләрне бик еш ишетергә туры килә миңа. Мондый ырым-шырымнарга ышанмасак иде! Чиста су алып, җылытасың да юасың!

Мәет юу тәртибенә килсәк, аны иң элек махсус тактага (колаша) салалар. Мәет юучы, кулын чүпрәк белән урый да, мәетнең тәнен төрле нәҗесләрдән пакьли башлый. Иң элек мәетнең башы белән аркасын аз гына күтәреп, утыртып ук бетермичә, мәетнең эченә җиңелчә генә басарга кирәк. Бу эчтән төрле нәҗесләр чыксын өчен эшләнә.

Әлеге гамәлләрдән соң, мәет юучы, кеше тәһарәт алганда нинди өлешләрен юа, мәетнең дә шул өлешләрен юа башлый. Мәетнең тешләрен, борынын, авызын да пакьләргә кирәк.

Бу гамәлләрне бик йомшак итеп башкарасы. Мәет эченә авызы аша су кереп китә күрмәсен. Аннан мәетнең бите юыла. Шуннан соң мәетнең кулларын кабат юасы (бармаклардан алып, терсәккә кадәр). Башта уң якны, аннары сул якны. Шуннан соң мәетнең башына мәсех (су белән сыпырып алу) кыласың. Чәчләрен юеш кул белән сыпырасың, колакларның эчен юасың, аннан аякка күчәсең. Тән өлешләрен бер тапкыр юарга, бу гына җитмәсә, кабат юарга мөмкин. Бу гамәлләрне кылгач, мәетнең башы, сакалы юыла. Аннан соң мәетнең тулысы белән уң ягын (алдын да, артын да) юа башлыйсың. Шушылай ук итеп сул ягын юасы.

Мәетне юа торган суга ислерәк берәр нәрсә салырга мөмкин. Әйтик, сабын яки камфора.

Мәетнең тәнен киптергәч, аны кәфенгә урыйлар. Тәнне юып бетергәч, алдыннанмы, артыннанмы нәҗес чыгарга мөмкин. Галимнәр әйтүенчә, шушы чыккан нәҗесне сөртеп, юып аласың да, мәетне тәһарәт алдырасың да, шул җитә.

Мәет юган суны нишләтергә?

– Түгәсе. Ул пычрак су санала. Аны ниндидер аерым урынга түгәседер дип баш ватасы юк.