|
|
Бүген кемнәр туган
|
|
Архив
|
01.08.2011 Җәмгыять
Хезмәт кенәгәсендә нәрсә язылган?Ил Президенты Дмитрий Медведевның беренче эш урыны урам себерүче булган. Бу хакта ул Кремльдә узган дәүләт бүләкләрен тапшыру тантанасында әйткән. “Хезмәт кенәгәмдә беренче язма – урам себерүче, соңгысы – Президент, – дип сөйләгән Медведев. – Университетта укыганда урам тәртибе сагында торырга туры килде”. Ә сезнең хезмәт кенәгәсендә беренче язма нинди? Харис МУСИН, Татарстан урман хуҗалыгы министры урынбасары:
– Минем беренче эш урыным – Теләче урманчылыгында бухгалтер. Беренче эш урынымның файдасы тиде. Гомер буе җыйнак булырга өйрәтте ул мине. Бухгалтер булып дүрт ай гына эшләсәм дә, бөтен әйберне исәптә тотарга өйрәндем. Урманда исап-хисап эше күп. Боларның нигезенә беренче эш урынымда төшендем.
Фәндәс САФИУЛЛИН, җәмәгать эшлеклесе:
– Пенсиягә чыкканчы хезмәт кенәгәм булмады. Аны хәрби кешеләргә бермиләр бит. 34 ел хезмәт итеп, армиядән киткәч кенә кенәгә алдым. Кенәгәсез хезмәтем турында сүз барса, эш тәҗрибәм бишенче сыйныфны тәмамлагач башланды. Безгә 1 нче сентябрьгә 35 “трудодень” алып килергә куштылар. Бу – авыл балалары өчен мәҗбүри. Авылдаш малайлар белән бергәләп беренче тапкыр ат җигеп тырмага чыктык. Печән җыя башлагач, ул эштә катнаштык. Аннары ындырга көлтә ташыдык. Аңа кадәр ял көннәрендә төнлә ат көтүенә чыга идек. Бәлки, беренче эшем шул булгандыр. Без, малай-шалай, җыелып төнлә учак ягып, бәрәңге пешереп, колхоз атларын көтә идек. Икенче сыйныфта колхоз кырына башак җыярга алып чыкканнарын да хәтерлим. Хезмәт кенәгәсен 54 яшемдә алдым. Андагы беренче язма – Татарстан Югары Советы депутаты. Ә соңгы язма – Россия Дәүләт Думасы депутаты. Кенәгәм депутат белән башлана, депутат белән бетә.
Изольда САХАРОВА, “Мисс Татарстан” иҗтимагый оешмасы президенты:
– Мин Казан дәүләт техник университетта укыган вакытта кафедрада лаборант булып эшләдем. Хезмәт кенәгәмдәге иң беренче язмам да шуннан гыйбарәт. Укуны эш белән бергә алып бардым. Ә аннары модель булып эшләдем. Икенче югары белемне Мәскәү дәүләт мәдәният һәм сәнгать университетында алдым.
Рабит БАТУЛЛА, язучы:
– Хезмәт кенәгәмдәге иң беренче язма – җидееллык мәктәптә укытучы. Мин Зәй төбәгенең Кадер авылы мәктәбендә укытучы булып эшләдем.
Әлфинә ӘЗҺӘМОВА, җырчы:
– Хезмәт кенәгәмә иң беренче теркәүне КамАЗ заводында куйдылар. Оешмада оператор булып эшләдем. Мәктәпне тәмамлагач ук КамАЗга килдем. Ул вакытта оешма-предприятиеләрдә эшләүчеләргә тулай торакта бүлмә бирәләр иде бит. Мин дә торак өмет итеп заводка бардым. Әмма күпме генә эшләсәм дә, бүлмә бирмәделәр. Заводтан киткәч кенә тораклы булдым. Миңа беренче эш урынымның бернинди файдасы тимәде.
|
Иң күп укылган
|