Кеше китә, эзе кала

Минем олы апам һәм аның сыйныфташлары: “Без бәхетле идек, чөнки мәктәптә безне Хәбиб абый Хәбибуллин укытты. Эх, нинди яхшы педагог һәм директор иде ул! Темаларны яхшы аңлата, укучыларны беркайчан да ачуланмый, ничектер яратып карый, гел елмаеп кына сөйләшә иде”, - дип сөйлиләр иде.

Гомере буе Мәчәләй авылы мәктәбендә эшләп, “Мәгариф отличнигы” исеменә лаек булган укытучы Җәүһәр Сафиулловна да аларның сүзләрен кабатлый: “Эшемдәге уңышларым, беренче чиратта, директорыбызның казанышы, дип әйтер идем. Чөнки мин үземдә аның характерын тәрбияләргә тырыштым. Аның кебек кеше тагын бармы икән? Бөтен яклап та чын КЕШЕ иде Хәбиб абый!” - ди.

Бүгенге көндә Самарада яшәүче Таһир ага Мамышев та Хәбиб абыйны яхшы сүз белән искә ала. Бигрәк тә 1939 елның декабрендә аның белән булган бер хәлне сөйләргә ярата. Урамда чатнама суык. 1нче сыйныфта укучы Таһир, әтисе эшләгән Подбельск пекарнясыннан ике буханка ипи алып, авылына кайтып барышы. Үрнәк бистәсе турысында бер кеше баланы ат чанасына утырта һәм, өстенә җылы әйбер ябып, авылга кайтарып куя. Хәбиб абыйның военкоматтан фин сугышына чакыру алып кайтуы булган икән. Тик аңа сугыштан кайту насыйп булмаган. Ә менә бала күңелендә бу очрашу матур хатирә булып сакланган.

Хәбиб абыйның сугышчан дусты Куйбышев кешесе булган. Сугыштан соң ул, Хәбиб абыйның гаиләсен табып, иптәше турында кешелекле, чын патриот иде, дигән.

- Финнарның аякларында кыска, ләкин киң чаңгылар. Аларга карлы урманда йөрүе уңай, әйтерсең зур чабата киеп йөриләр агачлар арасында. Ә безнең чаңгылар тар, озын. Шул сәбәпле безнекеләр урманнарда бик күп һәлак булдылар, - дип сөйләгән. Безнең Хәбиб абыебыз да шул урманнарда ятып калган инде менә. Туганнары каберен күпме генә эзләсәләр дә, таба алмадылар.

Хәбиб абыйның ике кызы һәм аларның балалары да үзе кебек уңган-булган, итагатьле һәм динле кешеләр булып үстеләр. Әтисе сугышка киткәндә, кызы Разия әле тумаган да булган. Ә бүген инде Разия үзе дә, абыстай буларак, авылдагы Коръән мәҗлесләрен алып бара, вәгазьләр сөйли, улы Сәйфулла күп еллар буе имам вазыйфаларын үти. Җәүһәриянең балалары да тырыш һәм абруйлы кешеләр.

Хәбиб абыйның күңеле тыныч булсын. Оныклары һәм оныкчыклары батыр йөрәкле бабаларын онытмыйлар, һәрвакыт хәер-догада.