01.02.2025 Икътисад

Татарстан һәм Казахстан аграр секторда хезмәттәшлекне көчәйтергә планлаштыралар

Татарстан Республикасы Премьер-министры урынбасары - Татарстан Республикасы авыл хуҗалыгы һәм азык-төлек министры Марат Җәббаров җитәкчелегендәге Татарстан Республикасы делегациясе эш сәфәре белән Казахстан Республикасында булып кайтты. Эре мөгезле терлекләр үрчетү, атлар үстерү һәм селекцияләү, шулай ук ит эшкәртү тәҗрибәсен өйрәнү һәм үзләштерү максатында Татарстан делегациясе Казахстанның эре агросәнәгать предприятиеләрендә булды.

Сәфәр барышында Марат Җәббаров Абай өлкәсе Акиме Нурлан Уранхаев белән очрашты. Яклар Татарстан һәм Казахстан агросәнәгать комплексының торышы турында фикер алыштылар, шулай ук уртак хезмәттәшлек перспективаларын билгеләп үттеләр.

Шулай ук эш сәфәре кысаларында Марат Җәббаров Казахстан Республикасы авыл хуҗалыгы Вице-министры Амангалий Бердалин белән очрашты. Вице-министр, аграр сектордагы хезмәттәшлек илләр арасында хезмәттәшлекнең өстенлекле юнәлешләренең берсе булып тора, дип билгеләп үтте һәм Казахстан Республикасы агросәнәгать комплексының потенциалы турында сөйләде.

2024 ел йомгаклары буенча Казахстан белән агросәнәгать комплексы продукциясенең товар әйләнеше 73,4 млн доллар булган. Яклар шулай ук авыл хуҗалыгы продукциясен сатуны арттыру белән кызыксынуларын билгеләп үттеләр.

Казахстан Республикасы белән Татарстан Республикасы арасында тышкы икътисадый багланышлар актив үсә. 2024 елда Казахстаннан Татарстанга 24,6 млн долларга продукция импортланган, ә экспорт 48,8 млн доллар тәшкил иткән. Үзара файдалы мөнәсәбәтләр партнерлыкны ныгыта һәм «Халыкара кооперация һәм экспорт» илкүләм проекты максатларына туры килә.

Фото: agro.tatarstan.ru

---
ТР Авыл хуҗалыгы һәм азык-төлек министрлыгы
№ --- | 01.02.2025