26.01.2025 Язмыш

Ун бала үстерсә дә, әнкәйнең кычкырганын хәтерләмим

Безнең әнкәй 1917 елгы, әткәй 1906 елда туган. Әнкәй 1947 елда әткәйгә кияүгә чыккан. Әткәй сугыштан 1946 елны кайтуына, хатыны үлеп киткән. 4 бала калган. Шул 4 бала өстенә без, 6 бала, туганбыз. 10 бала үстерсә дә, әнкәйнең чырай сытып кычкырганын хәтерләмим.

Эш кушса да, гел елмаеп, шаяртып, эшләтә белә иде. Ничек шулай бәләкәй генә өйдә тавыш чыгармыйча, балаларны тәртипле үстереп булган? Без әнкәйне тыңлап үстек, монда әткәйнең дә яхшы ир булуы мөһим роль уйнагандыр.

Шәһәргә укырга чыгып китсәң дә, атна саен әткәй-әнкәй янына кайтып, көч-куәт, үзеңә ышаныч алып киләсең. Транспорт булмаса да, кайта идек бит. Алар без кайтканга куана иде.

Миңа 6-7 яшьләр булгандыр, әнкәй белән бәләкәй арба тартып, аның әти-әниләренә киттек. Авыл арасы — 20 км. Җәйге эссе көн. Кире кайтып киләбез. Ярты юлны җәяү үттек. Безнең каршыга велосипедта берничә малай килеп чыкты. Алар укудан кайтып бара. Мин шуларның берсенә бәрелдем, борыным каный башлады. Яланда берни юк. Әнкәйнең арбага утыртып, мине өйгә кадәр алып кайтканы хәтердә. Ул арба буш түгел бит инде, күчтәнәч төяп җибәрәләр безгә. Картәтиләр бик хәлле кешеләр иде. Умарталары да бар иде. Соңыннан әткәй дә гомер буе умарта тотты. Җәен су керергә күлгә барып булмый иде. Бал аертырга кирәк. Центрифуганы әйләндереп, бал коясың. Рамны әнкәй бакчадан ташый, әткәй умартадан алып тора. Кайчан шул бал бетә инде, дип уйлый идек.

Әткәй бер дә намазын калдырмады. Әнкәйнең гает аенда пешергән беленнәре әле дә истә. Тары ярмасыннан әзерли иде. Әнкәй белән тугайга төшеп, балан, колмак, шомырт җыеп алып кайта идек.

Әткәй — 72 яшендә, әнкәй 78 яшькә җитеп вафат булдылар. Авыр туфраклары җиңел булсын.

Аларга авыр булгандыр. Безне карап үстереп, барыбызны да өйләндереп, кияүгә бирделәр. Оныкларны да үстерештеләр.

Нурия ИБРАҺИМОВА, Уфа.

---
Ирек мәйданы
№ --- | 26.01.2025