Көчле янгыннар барган Лос-Анджелестан Гөлназ: «Гомумән алганда, америкалылар ярдәмечел»

Лос-Анджелеста урман янгыннары 7 гыйнварда башланган иде. Соңгы мәгълүматлар буенча, аларда 24 кеше һәлак булган. Янгын сүндерүчеләр ут белән 116,5 кв метр мәйданда көрәшә. Якынча 105 мең кеше эвакуацияләнгән, тагын 87 меңенә яшәгән урыннарын калдырып китәргә туры килергә мөмкин.

Йортларын калдырып китүчеләр арасында Татарстан җырчысы, әлеге вакытта гаиләсе белән Америкада яшәүче Гөлназ Батталова да бар. Ул кечкенә кызы белән иренең әти-әниләренә вакытлыча күченде.

— Көчле янгыннар булу аркасында, без яши торган районда һава бозылгач, ирем безне әти-әниләренә китереп куйды. Хәзерге вакытта янгыннар ике зур җирдә бара. Алар берничә, ләкин бу икесендә аеруча көчле яна. Аларның берсендә янгыннар 30 процентка сүндерелгән, ләкин януын дәва итә. Ә икенчесе нибары 13 процентка гына сүндерелгән. Янгын нәкъ менә шушы җирдә башланган иде. Канададан, Мексикадан, АКШның башка штатларыннан янгын сүндерүчеләр килсә дә, ут телләрен җиңеп булмый.

Ял көннәрендә вазгыять уңайрак иде, хәтта без яши торган районны кызыл флаг зонасыннан алдылар. Ягъни һава бераз чистарды, янган ис ул дәрәҗәдә үк түгел. Ләкин хәлне океаннан килә торган җил катлауландыра. Ул янгыннарны көчәйтеп җибәргән дә иде инде, ялларда бераз тынып торды да, дүшәмбе кабаттан көчәйде. Аллаһка шөкер, якыннарыбыз, дусларыбыз арасында зыян күрүчеләр юк, чөнки алар башка шәһәрләрдә яши. Әлегә безнең өчен әти-әниләрдә калу куркынычсызрак. Безнең зона куркычсызрак урында. Шулай да без әлегә фатирыбызны калдырып торырга булдык. Иребез әлегә шунда калды. Без иң кирәкле әйберләрне генә алып, юлга кузгалдык, — дип сөйләде Гөлназ.

Моннан тыш, ул морадерлар корбаны булуын да сөйләде. Бәла-казалардан файдаланып, кешеләрнең мал-мөлкәтен талаучылар да арткан икән. Гөлназның ире Алексның да машинасын урлаган булганнар. Бәхеткә, ире каракны тиз арада куып җитеп, машинаны кире кайтара алган. “Гомумән алганда, Америка халкы ярдәмечел,тик, кызганыч, арада менә шундый намуссызлар да очрый”, — диде Гөлназ.