Тугыз яшьлек сабыен җир куенына салган ана: «Аңа унбиш тулыр иде. Йөрәк өзгәләнә инде»

Көчле булырга кирәк! Кемгәдер бу сүзләр бик гади генә тоелса да, Алабугада яшәүче Ленаны яшәргә рухландыра. 6 ел элек 9 яшьлек сабыен җир куенына салган ул.

Куркыныч авария 2018 елның декабрендә Казан белән Чаллыны тоташтырган юлда – Мамадыш районының Түбән Яке авылы янында килеп чыга. Волковлар гаиләсенең Балык Бистәсеннән Алабугага кайтып барышы була. Ир белән хатын зур зыян күрә: аларны табиблар яңадан диярлек «сүтеп җыя». 14 яшьлек кызларының хәтта сыдырылган урыны да булмый. 9 яшьлек Максимның исә авария урынында гомере өзелә.

– Күрәчәктер инде. Ул вакытта мин балалар бакчасында сакчы булып эшли идем. 23 е миңа төнгә эшкә чыгасы. Шунда бергә эшләүче егет, әйдә, көннәрне алыштырып торыйк, син 21 е чык әле, диде. Риза булдым. Ярар, мин әйтәм, авылга кайтып килербез, дидем. Язмышка шулай язылган булгандыр инде, – дип сөйли Лена. – 22 сендә авылга кайттык. Башта минекеләр янына – Каз Чаллысына кердек. Кичкә таба иремнең туган авылы – Иванайга кузгалдык. Кайтсак, этебез югалган. Улым Максим шуны эзләп чыгып китте. Авылны бик озак әйләнеп, этне таба алмыйча кайтты. Соңгы тапкыр авыл урамын әйләнүе булган икән.

Рәхәтләнеп кунак була алар авылда. Соңгы сәфәренә чыкканда, Максим юлга ипи белән колбаса алдыра. Үсеп килүче егетнең һәрвакыт ашыйсы килә! Кузгалып китәр алдыннан машинаның алгы утыргычына менеп кунаклый.

– Гадәттә алда мин утырам. Бу юлы төшереп кенә булмый бит! Машина ишеген эчтән бикләде дә куйды. Әҗәлен сизгән кебек, – дип искә ала Лена. – Юл буе, әйдә, әни, ипи белән колбаса ашыйк, дип кыстады. Алга утырса да, гел борылып миңа карап барды. Аның карашы Мамадыш районының Түбән Яке авылы янындагы үргә менгәндә өзелде. Безнең машина юл читенә чыгып очты. Бар дөнья караңгыланды. Ирем аңсыз, мин исә бөтен җиремнән кан акса да, аңымда, бар кешене барлап яттым. Улым ул вакытта үлгән булган инде.

Менә шул вакытта аларга ярдәм итәргә дип бер машина туктый. Лена танышрак тавышка күтәрелеп караса, каршысында җырчы Илназ Бах басып тора икән. Гастрольдән кайтышлары булган. Бәлагә тарыган машинаны күргәч, ярдәм итәргә туктаганнар.

– Илназ мине машинадан алып чыкмакчы була. Ә урамда салкын! Машина эчендәге утыргычны каерып чыгарып, шуның өстенә салды. «Ашыгыч ярдәм» машинасын да озак көттек. 45 минут машина эчендә үлгән балама карап яттым. Табиблар Максимымның мәетен Мамадыш хастаханәсенә, иремне, аннан кызым белән мине Алабугага алып китте. Шул чакта миңа булышкан Илназ Бахка мин көн саен рәхмәт укыйм. Әгәр ул очрамаса, без нишләр идек, – ди Лена.

Алабугага барганда Лена белән кызы утырган «ашыгыч ярдәм» авариягә очрый. Светофорда туктап торган машина артына икенчесе килеп төртелә. Ишекләр ачылып китә, Лена каталкасы белән  җиргә килеп төшә.

– Ул чакта баш ярылган, аяк-куллар сынган. Янымдагы шәфкать туташы бик курыкты инде. Үлә бит, дип тизрәк икенче  машина чакыртты. Мине төнлә «сүтеп җыйганнар». Икенче көнне кичке якта аякка Илизаров аппараты куеп, үземне тегеп-ямап палатага чыгардылар. Табибларны көтеп тордым да, иртәгә баламны җирлиләр, мин кайтам, дидем. Төштән соң кире хастаханәгә китереп тә куйдылар. Менә шул вакытта инде хәлсезләнеп егылганмын, – ди Лена.

Аны яңадан реанимациядә кеше итәләр. Улының кырыгына өенә чыга ул. Гаиләне тәрбияләргә дип I группа инвалид ирен ияртеп каенанасы килә. Улын да, киленен дә, ирен дә тәрбияли.

– Иремә 2017 елда яман шеш диагнозы куйганнар иде. Шөкер, аякка басты, әкренләп йөреп тора. Кызыма 20 яшь. Улыма да 15 тулыр иде. Йөрәк өзгәләнә инде. Аны кешегә әйтеп, сөйләп утырудан ни файда?! Елап та алам. Тик мин бәргәләнеп кенә кайта торган җиргә китмәде шул. Яшьтәшләрен күрсәм, күңел өзгәләнә. Улымның урыны оҗмахтадыр дип тынычланам, – ди Лена. – Хәзер инде бөтен яралар яңадан сызлый. Авыртмаган җир юк. «Ашыгыч ярдәм»нән төшеп киткәндә бот сөягемне, билемне авырттырганмын. Ул урыннар бик авырта инде хәзер. Әмма яшәргә кирәк. Кызымның бәхетен күреп, игелен тоеп яшиселәребез алда бит әле безнең.