18.12.2024 Дин

Догалар кайсы вакытта кабул була?

«Дога ул бәлаләрдән саклый, хәтта кешенең тәкъдирен дә үзгәртә ала» (Хәдис).
Һәрвакыт дога кылган кеше беркайчан да үзен ялгыз итеп тоймас, чөнки Аллаһ кешенең догасын җавапсыз калдырмый. Әмма дога кабул булуның шартлары бар.

1 шарт: хәләл ризык белән туклану, хәләл кием кию һәм хәләл кәсеп белән шөгыльләнү.

2 шарт: доганың кабул булуы өчен ихласлык кирәк. Сораганымны Аллаһ кабул итәрме-юкмы икән, дип шикләнергә ярамый.

3 шарт: өмет һәм сабырлык белән дога кылу. Булса була, булмаса – юк, дип торсаң, әлбәттә, кабул булмый, ихластан, өметләнеп сорасаң, чынга ашу ихтималы да арта.

Догада шуны аңларга кирәк: син Хуҗаңнан сорыйсың, ә калганын Ул хәл итә. Шуны да белик: кеше, дога кылу өчен, Аллаһка теләсә кайчан мөрәҗәгать итә ала. Шулай да, дога кабул булу ихтималы зур булган кайбер вакытлар динебез тарафыннан аерып күрсәтелгән.

Мәсәлән:

Төнге намаз вакытында. Пәйгамбәребез салләллаһу галәйһи вә сәлләм: «Доганың кабул булу ихтималы зур булган вакыт ул – төнге намаз – тәһәҗҗүд вакыты», – дигән.

Азан әйткәндә. Пәйгамбәребез салләллаһу галәйһи вә сәлләм: «Мөәзин азан әйткәндә, күк капкалары ачыла һәм догаларга җавап бирелә», – дигән (Әл-Хәким, Әбү Ягълә).

Фарыз намазыннан соң. Пәйгамбәребездән: «Кайсы догалар тиз кабул була?» – дип соралгач, ул: «Төн уртасында һәм һәр фарыз намазыннан соң кылганнары», – дип җавап биргән (имам Әт-Тирмизи).

Җомга көнне. Пәйгамбәребез салләллаһу галәйһи вә сәлләм: «Җомга көнне дога кабул була торган яшерен бер вакыт бар», – дигән.

Яңгыр яуганда. Пәйгамбәребез салләллаһу галәйһи вә сәлләм: «Ике очракта Аллаһы Тәгалә доганы һичшиксез кабул итә: намазга азан әйткәндә һәм яңгыр яуганда», – дигән (Җәмигуль әхәдис).

Хөрмәтле дин кардәшләрем, димәк, яңгыр – Аллаһның рәхмәте ул! Һава торышлары үзгәргәндә сабыр итеп, догада булыйк, Раббыбыздан хәерлесен сорыйк.

Фото: https://ru.freepik.com/

Тимергали хәзрәт ЮЛДАШЕВ
Шәһри Казан
№ --- | 18.12.2024