Татар теленнән имтиханны 100 баллга биргән Регина Инсапова: «Татарлыгым гаиләмнән килә»

2024 нче елгы чыгарылыш сыйныф укучылары арасында Регина Инсапова татар теленнән имтиханны 100 баллга тапшырды. Казан кызын татар теленнән имтихан бирергә нәрсә этәрде икән?

– Регина, үзең белән якыннанрак таныштыр әле.

– Мин быел Казан шәһәренең Авиатөзелеш районында урнашкан 10 нчы гимназияне тәмамладым. Беренче сыйныфтан алып әлеге мәктәптә белем алдым. Уку дәверендә актив рәвештә мәктәп тормышында катнаштым, төрле ярыш, бәйгеләрдә үз көчемне сынадым. 11 нче сыйныфта рус теле һәм математика фәннәреннән тыш, татар теле һәм җәмгыять белеменнән БДИ тапшырдым.

– Татар теленнән имтихан сайларга нәрсә этәрде?

– Укытучылар татар теленнән дә имтихан сайларга мөмкин булуын әйткәч, «Үземне сынап карыйм әле» дип уйладым. Татар телен сайлавыма дусларым да, әти-әнием дә шаккаттылар, хәтта үзем дә аптырап куйдым.

– Имтиханга ничек әзерләндең? Авыр булдымы?

– Татар теленнән имтиханга укытучым белән берлектә әзерләндем. Китапханәдән төрле сыйныфлар өчен булган татар теле дәреслекләрен алдык, мәгариф министрлыгы сайтыннан КИМ нар өйрәндек, дәрестән тыш калып та әзерләндек. Имтиханга барганда, күңелдә ниндидер тынычлык хисе иде, ә инде аудиториягә кереп утыргач, куркыта башлады: «Булдыра алырмынмы? Нинди биремнәр эләгер икән?» дип борчылдым.

Нәтиҗәләр килүен белгәч, курка-курка гына сайтны ачтым. Балларны күргәч, шаккаттым, ышанмадым! Шатлыгымның чиге булмады.

– Шәһәр мохитендә каян килде сиңа туган телгә шундый мәхәббәт?

– Татарлыгым гаиләмнән килә. Әти-әнием кечкенәдән минем белән татар телендә аралаштылар, әби-бабам үз халкымның йолаларын хөрмәт итәргә өйрәтте.

– Татарча җырлар тыңлыйсыңмы?

– Әйе, татар җырларын бик яратып тыңлыйм. Иң яраткан җырчыларым – Ильмира Нәгыймова һәм Марат Яруллин. Машинада барганда да аларның җырларын кычкыртып кушып куям. Татар блогерларыннан Шарапҗанны яратып карыйм. Ул юморы белән үзенә җәлеп итә.

– Синеңчә татар телен үстерү, популярлаштыру өчен нәрсә эшләргә кирәк?

– Татар телен үстерү өчен балаларны кечкенәдән татар мохитендә тәрбияләргә кирәк: татарча аралашырга, йолалар, гореф-гадәтләребезне сеңдерергә, җыр-бию кебек рухи байлыгыбызны тапшырырга. Шул очракта гына татар теленә ихтыяҗ булыр.

– Нинди кызыксынуларың бар?

– Дүрт яшемнән алып дистә елга якын бию түгәрәгенә йөрдем. Хәзер кабат бию студиясенә язылырга уйлап торам. Бию миңа ниндидер көч бирә. Биюдән тыш бьюти өлкәсе кызыксындыра.

– Киләчәктә үзеңне кем итеп күрәсең?

– Киләчәгемне мәктәп, балалар белән бәйлисем килә: башлангыч сыйныфлар укытучысы булырга телим.

– Чыгарылыш сыйныф укучыларына нинди киңәшләр бирер идең?

– Нәрсә генә булмасын, бернидән дә курыкмаска һәм инде, әлбәттә, тырышып укырга киңәш итәр идем.

Фото: Фирүзә Вәлиева