01.11.2024 Мәдәният

«Татар эстрадасының поезды» ил буйлап йөри

Спектакль беренче тапкыр 2008 елда уйнала. Ул татар халкының легендар җырчысы, ТАССРның халык артисты Рәшит Ваһаповның 100 еллыгына багышлана. Реаль вакыйгаларга нигезләнгән.

4-5нче ноябрьдә Габдулла Кариев исемендәге Казан татар дәүләт яшь тамашачы театрында Ренат Харис әсәре буенча куелган «Умырзая» спектакленең премьерасы була. Режиссер – Ренат Әюпов.

Төп рольдә – Татарстанның атказанган артисты Фәнис Кәлимуллин. 4 ноябрь театрда актерның 50 яшьлек юбилей кичәсе дә узачак.

Ренат Әюпов, Габдулла Кариев театрының баш режиссеры:

– Рәшит Ваһапов – татар җыры сакланып калуының «солдаты» булган. Бу корал күтәреп сугышу түгел, җырның фәлсәфи корал икәнен дәлилләү. Җыр – халыкның күңелен патриотик рухта сафландыра алган. Ваһапов татар җырларын советлар союзындагы төбәкләргә җиткерер өчен көчен дә, сәламәтлеген дә кызганмый. Беренчеләрдән булып татар эстрадасы поездын ачып җибәрүче дә әле ул.

Спектакльнең 2008 нче елда куелган вариантында бөтен состав катнаша иде, хәзер ул камерныйга калды. Хәзерге куелышта күбрәк Рәшит Ваһаповның эчке психологиясенә, аның агитбригадасына басым ясалды. Ягъни спектакльдә яралы хәрбиләрне патриотик рухта тәрбияләү линиясе алып барыла. 16 ел эчендә Фәнис Кәлимуллин да, труппа да үзгәрде. Эчке кичерешләр буенча алар баедылар, тәҗрибәләре үсте. Фәнис хәзер Рәшит Ваһапов яшәгән яшькә килеп җитте. Шуның өчен дә актер җырчының тарихы, драмасы белән бертигез булып, уртак рефлексиягә килделәр, һәм спектакль тагын да баеды.

* * *

1942 нче ел... Рәшит Ваһапов һәм аның иҗади дуслары фронтта гастрольләр оештыру өчен партиядән карар көтәләр, ләкин «Юк!» дигән җавап алалар. Шуннан филармония директоры артислардан иҗади төркем оештырып, тылда һәм госпитальләрдә яралыларның патриотик рухын күтәрергә дигән тәкъдим ясый. Бу артистларны рухландыра һәм «татар эстрадасының поезды»на юл ача. Рәшит Ваһаповның барлык концертлары да аншлаг белән уза. Әмма даими күченүләр җырчының сәламәтлеген какшата. Рәшит Ваһапов хастаханәгә эләгеп, аңа уңышсыз операция ясыйлар. Рәшит Ваһапов һәм аның иҗат төркеме – татар эстрадасына нигез салучылар. «Татар эстрадасының поезды» бөтен ил буйлап йөри һәм бөек артист үлгәннән соң да, совет халкының патриотик рухын күтәрә...

---
Кариев театры
№ --- | 01.11.2024