21.10.2024 Сәясәт

Дмитрий Песков: Владимир Путин бүген Казанга киләчәк

Россия Президенты Владимир Путин дүшәмбе кичен Казанга юл тотачак, анда БРИКС саммиты уза. Бу хакта брифингта дәүләт башлыгының матбугат сәркатибе Дмитрий Песков хәбәр итте, дип яза Татар-информ.

«Көн азагында президент Казанга килә, анда иртәгә БРИКС саммиты кысаларында эш башлана», - диде Кремль вәкиле журналистларга.

БРИКС саммиты Казанда 22-24 октябрьдә уза. Анда 30дан артык дәүләт вәкилләре катнаша.

Украинада конфликтны хәл итү юллары турында фикер алышу Казанда узачак БРИКС саммитының көн тәртибенә керми. Бу хакта Кремльнең рәсми вәкиле Дмитрий Песков белдерде. «Известия» газетасы шул хакта яза.

Шул ук вакытта, Россия дәүләте башлыгы матбугат сәркатибе сүзләренчә, чараның теләсә кайсы катнашучысы бу темага мөстәкыйль рәвештә кагылырга хокуклы.

Шуның белән моңа кадәр РФ Президенты ярдәмчесе Юрий Ушаков хәбәр иткәнчә, Украинадагы кораллы каршылык һәм хәзер җәелеп килүче башка конфликтлар турында 22 октябрьдә БРИКС саммитының беренче утырышында фикер алышачаклар.

Дипломат ачыклык керткәнчә, утырыш барышында Бразилия һәм Кытай вәкилләре бу конфликтларны ничек аңлаулары турында сөйләячәк. Элегрәк бу илләр башта диалог һәм сөйләшүләрне Украинадагы вазгыятьне җайга салуның бердәнбер юлы дип атады, ә соңрак кризисны хәл итү өчен «Дөнья дуслары» платформасын булдыру турында хәбәр итте.

БРИКСның 16нчы саммиты Казанда 22- 24 октябрьдә була. Анда 33 дәүләт вәкиле катнашуын раслады. Владимир Путин аның кысаларында 15тән артык ике яклы очрашу үткәрергә җыена.

Татарстан Рәисе Рөстәм Миңнеханов билгеләп үткәнчә, мондый дәрәҗәдәге вакыйганы үткәрү – республика өчен зур мәртәбә һәм җаваплылык. Республика башкаласы мэры Илсур Метшин ул көннәрдә шәһәрнең 20 меңгә якын кунакны кабул итәчәген әйтте.

Фото Кремль сайтыннан

---
Матбугат.ру
№ --- | 21.10.2024