02.10.2024 Криминал

28 ел элек ул кеше үтергән

Уфаның Октябрь районы прокуратурасы Свердловск өлкәсендә яшәүчегә карата җинаять эше буенча гаепләү раслады. Ул РСФСР Җинаять кодексының 103нче маддәсе буенча (“аңлы рәвештә үтерү”) гаепләнә. Хәл болай булган.

1996 елның апрелендә гаепләнүче һәм аның дусты, бер яктан, һәм ике ир-ат – икенче яктан, Уфада Комсомол урамындагы йорт ишегалдында җәнҗал килеп чыккан. Шуннан соң талашучылар әүмәкләшеп сугышып китәләр: гаепләнүче пистолеттан атып җибәрә. Конфликтта катнашучыларның берсе яраланган, ахырда үлгән.

Бу хәлдән соң әлеге ир-ат икенче илгә киткән, анда исемен үзгәрткән. Соңрак Русиягә кайтып, Смоленск өлкәсендә яши башлаган. Анда өйләнгән, хатынының фамилиясен алган. 2019 елда ул кеше урлаган һәм талаган өчен ирегеннән мәхрүм ителгән.

“Гаепләнүченең җинаять кылуга катнашлыгын элек төрмәдә утыручыларны тикшерү барышында, шул исәптә антропометрия мәгълүматлары (Антропометрик мәгълүматлар – кеше гәүдәсенең буй, авырлык, күләмнәр кебек төп физик параметрлары. – Авт.) буенча да ачыклау мөмкин булган. Җинаять эше арытаба карау өчен Октябрь район судына юнәлтеләчәк”, – диләр ведомствода.

“2024 елда Русия Тикшерү комитетының төбәк идарәсе тикшерүчеләре һәм криминалистлары тарафыннан республика Эчке эшләр министрлыгы оперативниклары белән берлектә эш материаллары яңадан анализланды, иректән мәхрүм ителүгә хөкем ителгән кешеләр тикшерелде, шул исәптән антропометрик мәгълүматлар буенча да, нәтиҗәдә эзләнүче кешенең талау һөҗүме һәм кеше урлау өчен хөкем ителгән гаепләнүче белән охшашлыгы ачыкланды. Шаһитлар ир-атта эзләнүче кешене таныганнар һәм җыелган дәлилләрне күрсәткәннән соң фигурант җинаять кылуын таныган”, — дип өстәделәр Русия Тикшерү комитетының БР буенча Тикшерү идарәсендә.

Чыганак: bashinform.ru

Әлфия ШАКИРҖАНОВА
Өмет
№ --- | 02.10.2024