Казанда студентларны тулай торакка кертмәгәннәр: урамда кунганнар

Янәсе тулай торакта комендант сәгате керткәннәр, әмма укучылар бу хакта белмәгәннәр. Бу хакта «Казанферст» яза. Казан медицина университетында күңелсез хәл булган: уку йортының тулай торагында яшәүче студентлар төнлә үз бүлмәләренә керә алмаган. Төнлә тулай торакка кайткач, бинаның ишекләре ябык булган.

Барысы да, янәсе, студентлар белмәгән комендант сәгате аркасында. Эчкә керергә комендантка шалтыратулар да, полициягә мөрәҗәгать итүләр дә ярдәм итмәгән. Университетта мондый вәзгыятьнең чыннан да булганлыгын расладылар.

Югары уку йортында махсус комиссия төзелгән, аның эш йомгаклары буенча пропуск режимын оештыру буенча чаралар күрергә дигән карар чыгарылган була. Татарстанның Кеше хокуклары буенча вәкаләтле вәкиле Сәрия Сабурская белдергәнчә, нинди генә шартларга карамастан, студентларны тулай торак бинасына кертергә тиеш булганнар.

Бу хәлнең барлык шартларын җентекләп өйрәнеп, студентларның хокукларын бозуга юл куйган затларга карата җавап чаралары күрергә кирәк, — дигән ул.