Илсөя Бәдретдинова: Капкан хәлдә сәхнәгә беркайчан да чыкмыйм

Без әле кая барабыз? Һәрдаим игътибар үзәгендә булган артистларның кайбер гамәлләреннән соң әнә шул сорауны бирәсе килә. Хәзер инде җырлый белмәгән җырчыларга әллә ни аптырамыйбыз. Замана техникасы анысын да җайлый. Тик кайберәүләр тавышны гына түгел, әхлак, тамашачыга карата хөрмәтне дә икенче планга куя башлады.

Ахыр чиктә артистның язмышын барыбер тамашачы хәл итә. Татарстанның атказанган артисты Илсөя Бәдретдинова әнә шундый фикердә.

– Артистлар үзләрен ямьсез тота, диләр. Үзен ямьсез тота икән, барма син ул артистның концертына! Мин һәрвакыт әйтәм: артистның язмышын тамашачы хәл итә. Әгәр ул сине яратмый икән, концертыңа килми. Әгәр ниләр кылануына карамастан, артистның концертына йөриләр икән, ул нишли? Эшләвен дәвам иттерә, – ди ул бу хакта.

Кием – хөрмәт күрсәтү билгесе, дигән фикер белән Илсөя Бәдретдинова да килешә. Хәер, җырчының үзенең һәм сәхнәдә басып торучы командасының тышкы кыяфәтенә игътибарлы булуы болай да күренә инде.

– Быелгы сезон әле башланмаган да, мин инде киләсе сезонга костюмнарга заказ бирдем. Төймәсенә кадәр сайлыйм. Бу – минем «бзик». Бөтен кеше алай булырга тиеш димим. Ләкин сәхнә күлмәге – сәхнә күлмәге инде ул. Аннан соң, артист өчен кабатланмас булу, индивидуальлек тә мөһим. Аны тамашачы күрә бит. «Әй, бу шушыныкы кебек булган инде» дигән сүздән дә авыррагы юк минем өчен. Мин ничек тә булса андый әйбердән качарга тырышам. Кемне дә булса кабатлау – үз-үзеңә аяк чалу ул. Моның белән шөгыльләнүче коллегаларымны аңламыйм, – ди Илсөя.

Сәхнә – изге урын. Бу сүзләрне Илсөя Бәдретдинова да кабатлады. Ә сәхнә нәрсәне кичерми?

– Быел зур сәхнәгә чыкканыма – 22 ел. Аллаһы Тәгалә алдында курыкмыйча әйтә алам: шушы еллар эчендә бер тапкыр да авызыма бер тамчы шампан шәрабе кабып та сәхнәдә чыгыш ясаганым юк. Бәлки, кем өчендер бу – нормаль күренештер, әмма минем өчен – табу. Фәрештә түгелмен, бөтенләй авызыма капканым юк дип әйтмим. Ләкин андый хәлдә сәхнәгә беркайчан да чыкмыйм. Тамашачының төрлесе була. Ләкин: «И кызым, сине күрергә дип улым алып килде. Хәзер үлсәм дә була», – дип торучы ак яулыклы әбиләр алдына андый халәттә нинди оятым белән чыгыйм? Бу – бер. Икенчедән, сәхнә ясалмалыкны кичерми.