Ришат Төхвәтуллин: Гаилә проблемалары психикага нык бәрә

Без әле кая барабыз? Һәрдаим игътибар үзәгендә булган артистларның кайбер гамәлләреннән соң әнә шул сорауны бирәсе килә. Хәзер инде җырлый белмәгән җырчыларга әллә ни аптырамыйбыз. Замана техникасы анысын да җайлый.

Тик кайберәүләр тавышны гына түгел, әхлак, тамашачыга карата хөрмәтне дә икенче планга куя башлады.  Артист тормышында танылу, тамашачы мәхәббәте, иҗади кризислар бер-берсен алыштырып тора. Бу исә рухны сыный.

Татарстанның һәм Башкортстанның атказанган артисты Ришат Төхвәтуллин шулай ди.

– Шуның өстенә тормыш, гаилә проблемалары да артистны читләтеп узмый. Бу психикага нык бәрә. Шулай рух ныклыгы сынала. Монда, әлбәттә, гаиләдә алган тәрбия, тормыш кыйммәтләренең роле зур. Ләкин нинди генә проблема булмасын, син сәхнәдә, тамашачы алдында үзеңне лаеклы тотарга, халыкка нәрсә җиткерергә теләгәнеңне аңлап чыгыш ясарга тиеш, – диде ул “ВТ” хәбәрчесенә. Кием – үзе бер сәнәгать. Ришат Төхвәтуллин шундый фикердә. – Аны халыкка хөрмәт курсәтү дип тә кабул итәргә була, – ди ул. –Ә икенче яктан… Берсендә бер рус төркеменең чыгышын күзәтергә туры килде. Нәрсәдән килделәр (ә алар шорты кигән иде) – шуның белән сәхнәгә чыгып киттеләр. Мин аларны шундый кыяфәттә чыгыш ясап, халыкка хөрмәтсезлек күрсәтәләр дип әйтә алмыйм, аларның иҗат стильләре, образлары һәм аудиторияләре шундый. Дискотекаларда килешә андый кием, классик стильдәге кием киеп җырламыйсың бит инде. Иң мөһиме – чараның форматына, аудиториягә карап, образ урынлымы юкмы – шуны уйлап киенергә кирәк.