«Әгәр дә ир кеше генә эшләгән икән, мал ир кешегә генә кала, хатын-кызга бернәрсә дә эләкми...»

Һәм менә бервакыт ул Юлияны очрата. Кыз уен автоматлары салонында эшли икән. Айдар кызга бер күрүдә гашыйк булган. Ярты ел очрашкач, өйләнешеп тә куялар. Малайлары туа. Айдар белән Юлия ипотека алып, ике бүлмәле фатирга күчәләр. Егет "уен"га бәйлелегеннән терелә, сигез ел эчендә ипотеканы тулысынча каплап бетерәләр. Юлия икенче балага авырга уза. Айдарның хатынын аборт ясарга үгетләвен ишеткәч, мин бик гаҗәпләндем. 

 

Бәхеткә, Юлияны каенанасы хуплаган, кызлары туа. Ни гаҗәп, ир икенче баласын да бик ярата. Һәм аяз көнне яшен яшьнәгәндәй, барыбызны да һуштан яздырган, Айдарның әнисен аяктан еккан вакыйга: ир хатынын, ике баласын калдырып, әти-әнисендә яшәячәген әйтә. Кызларына бары сигез ай гына иде бу вакытта. Айдар балаларын үстерешергә һәм тәрбияләргә ярдәм итәчәген, әмма Юлия белән башка яши алмаячагын белдерә, хисләр сүрелде, янәсе. Тиздән аның башка хатын белән чуалуы ачыклана. 

 

Балаларын бик сагына иде Айдар. Юлияга ул даими рәвештә акча бирде, тулысынча тәэмин итеп торды. Балалар да аны бик сагынды. Ике гаилә арасында яшәп булмый,  балалар хакына булса да, дип Айдар Юлия янына кире кайтырга карар кылган. Хатыны аны гафу итмәгән, ләкин бер үзе генә балаларны да аякка бастырырга теләми...

Нишләргә икән аларга?

 

Хәзрәт киңәше: «Ир эшләгән икән, мал аңа калсын»

«Туган авылым» мәчете имам хатибы Нурулла хәзрәт Зиннәтуллин:

- Бөтен проблеманың да төп сәбәбе – иман бетүдә. Иман беткәч, кеше үзенең нәфесе, рәхәте белән яши башлый, ягъни аңа гына әйбәт булсын, аңа гына рәхәт булсын. Гаилә тормышында миңа гына рәхәт булсын дип яши башладыңмы, димәк, бу тормыш таркалачак. Чөнки гаиләдә үзеңне түгел, хатын – ирен, ир хатынын, икесе дә балаларын уйларга, кайгыртырга тиеш. Элек бер-берләрен яратмасалар да, үзләрен корбан итеп торганнар, үзләре турында гына уйламаганнар. Кешенең үзе турында гына уйлавы, эгоизм аерылуларга сәбәпче була дип уйлыйм. 

Ислам дине буенча, аерылышканнан соң тәртипләр икенче төрле, менә шул тәртипләрне кертергә кирәк. Мәсәлән, ислам динендә мал иллегә – илле итеп бүленми. Әгәр дә ир кеше генә эшләгән икән, мал ир кешегә генә кала, хатын-кызга бернәрсә дә эләкми. Аерылышуга гариза бирүчеләрнең күпчелеге - хатын-кызлар. Монда өстенлекне хатын-кызга түгел, ир кешегә бирергә кирәк. Ни өчен дигәндә, чөнки хатын-кыз ул күбрәк хисләр белән эш итә, бүген аңа начар, ләкин бер атнадан яхшы булырга мөмкин. Әмма инде куллар куелган, судка бирелгән. Балаларны бүлгән вакытта да суд күбесенчә аларны әнигә калдыра. Аны әтигә дә калдыра торган итеп карар кабул итәргә кирәк. Чөнки әти кеше балалары белән үзе генә каласын уйласа, аерылуга бармаячак. Хатын-кыз да балаларыннан мәхрүм калачагын уйлап, аерылудан тыелырга мөмкин…

 

Фото: https://ru.freepik.com/