20.06.2024 Мәдәният

Флюра Абдуллина: "Әхтәм абыйның күңеле тулганда кабинет ишеген ачып гармун уйнар иде"

Татарның олпат шәхесе Әхтәм абый Зариповның вафаты турында бүген иртән яздык. Танылган телевизон журналист Флюра Абдуллина "Матбугат.ру"га Әхтәм абый белән эшләгән еллары турында сөйләде, җылы хатирәләре белән уртаклашты:

- Мин телевидениегә килгәндә Әхтәм абый баш режиссер булып эшли иде. Ул вакытта урамнарда татарча сөйләшергә ярамый торган чор. Телевидениенең ишеген ачып керүгә, биредә барлык кеше дә татарча гына сөйләшә. Телевидение татарның дәүләте иде. Әхтәм абый ул безнең әтиебез кебек булды. Һәрвакыт киңәшләрен бирер, ярдәм итәр иде. Олпат шәхес. Татарның телен саклады, яклады. Күңеле тулганда кабинетының ишеген ачып куяр иде. Нәкъ уртага утырып, гармунын уйнар иде. Шалтырата иде. Хәлләрен сөйли иде. Мин дә вакытым булганда Әхтәм абыйга шалтыраттым, хәлен белергә тырыштым. Күңелдә Әхтәм абый белән бәйле бары тик якты хәтирәләр генә саклана.

Телевидениедә дүшәмбе көнне летучкалар уза иде. Рецензияне Әхтәм абый ясый дигән көнне барлык телевидение хезмәткәрләре килә. Дөрес, төгәл итеп рецензия ясый белде. Аның тәнкыйтенә беркем дә битараф калмагандыр, дип уйлыйм. Шулай бервакыт Әхтәм абый Хаҗ сәфәренә юл алды. Безгә һәрберебезгә зәм-зәм суын алып кайтып эчертте. Рәхмәт Сезгә, Әхтәм абый, Сез минем күңелемдә мәңге сакланачаксыз. Урыныгыз җәннәттә булсын.

Казан кооператив институтының Дәрдемәнд исемендәге Татар мәдәнияте үзәгендә ТВ ветераннарына багышлап чара. 2020 ел.

---
Матбугат.ру
№ --- | 20.06.2024