Хастаханәгә ятарга баш тарткан 22 яшьлек күпбалалы ана белән сабыйның гомере кыл өстендә булган

Республика клиник хастаханәсенең перинаталь үзәге табиблары бишенче балага узган 22 яшьлек хатын-кызның аналыгын саклап калып, тиңдәшсез операция ясаган. Аңа сидек куыгының аналыкка ябышуы, яралгының аналыкта бик түбән урнашуы, аналыкта 13 сантиметр озынлыктагы бүсер кебек бик куркыныч диагноз куелган.

Бу диагноз яшь анага йөклелекнең 18нче атнасында куелган булган.

Ул берсеннән-берсе кечкенә дүрт баласы (зурысына – 5 яшь) булу сәбәпле, хастаханәгә кереп ятудан озак кына баш тартып килгән.

Шулай да табиблар аны хастаханәгә ятарга күндергән, дип яза “KazanFirst”. Табиблар йөклелекне 35 атнага җиткергәч, баланы ярып алган.

Операцияне анестезиолог-реаниматолог Евгений Кочетков, неонатологлар контролендә акушер-гинекологлар Әхмад Халед Әл-Аккуми һәм Лилия Шебиб ясаган. Операция барышында табиблар бик зур саклык белән сидек куыгын аналыктан аеруга, аналыкның бала урыны ябышкан өлешен кисеп алуга ирешкән.

Табибларның осталыгы нәтиҗәсендә шундый катлаулы операция өчен бик аз – нибары 1,7 литр гына кан агып чыккан. Күпбалалы ана, операциядән соң алтынчы көн киткәч, хастаханәдән өенә чыгарылган. Ә инде вакытыннан аз гына алда туган нарасый бу вакытта яңа туган балалар патологиясе бүлегендә табиблар күзәтүендә булган.

Фото: фрипик.ком