Данис Шакиров: “Сабан туеның төп кунагы – артист түгел!”

Бүген Хөкүмәт йортында узган брифингта Татарстандагы милли бәйрәмнәр турында сөйләштеләр. Бөтендөнья татар конгрессы башкарма комитеты рәисе Данис Шакиров Сабан туеннан тамаша ясау җәһәтеннән үз фикерен җиткерде.

Аның сүзләренчә, Сабан туеның төп билгесе – теге яисә бу зур артистның килүе түгел.

“Хәтта артистлар үзләре дә бу фикер белән килешәләр. Сәхнә тирәсендә генә тупланып, шушы артистларны тыңлап тора торган бәйрәм түгел ул. Билгеле, аның эчтәлеген бер-ике елда гына үзгәртә алмабыз. Әмма бу күренештән китәргә иде. Сабан туеның төп кунагы – артист түгел!” – диде ул. Аннан соң, Сабан туе милли уеннары, ярышлары белән үзенчәлекле. Данис Шакиров сүзләренчә, милли ярышларның да асылын сакларга кирәк. “Әйтик, чүлмәк ватканда пластмасс чиләк куеп булмый бит инде. Аның таягы да сәнәктән алынган таяк кына була алмый. Аннан соң, милли ярышларны балалар мәйданчыгы итеп кенә кабул итмәсеннәр иде. Һәм, гомумән, Сабан туе – читтән күзәтә торган тамаша түгел, анда катнашырга кирәк”, – дип сөйләде Данис Шакиров