МАШИНАҢНЫ САТА БАШЛАСАҢ, АВАРИЯГӘ ЮЛЫГЫРСЫҢ

Марат Мухин һәм Дилә Нигъмәтуллина. Берсе җырларны яза, икенчесе җырлый. Икесенә бер машина – “Опель Астра”. Рульне алар ничек бүлешә? Җырлы гаилә белән машиналары турында сөйләштек.

- Марат, ни өчен “Астра”?

- Тюльпаннар булмады чөнки (көлә). Ә, чынлап әйткәндә, бу бик шәп машина. Моңарчы “КИА Спектра”да йөрдек. “Астра” аңа караганда уңайлырак, подвескасы катырак, борылышларга яхшырак керә.

- Кара машина алгансыз икән.

- Кызыл һәм кара арасында сайландык. Караны “завод загары” дип йөртәм (көлә).

- Машинаның хуҗасы бер булырга тиеш диләр. Сездә кем “хуҗарак”?

- Дилә, әлбәттә. Без аны Диләнең туган көненә алдык бит. Май аенда Чаллыга “Опель Корса” карарга барган идек. Шунда “Астра” алырга үгетләделәр. Классы да югарырак, зуррак та.

- Әмма бит күп егетләр рульдәге хатын-кызга бик куркып карый.

- Дилә бик яхшы йөри машинада. Мин курыкмыйм. Дөрес, ерак юлларга чыкканда үзем утырам. Ә болай – гел Дилә. Хатының машина йөрткәндә бик уңайлы, чөнки янында сыра эчеп бара аласың (көлә).

- Дилә, гастрольләргә дә шуның белән йөрисезме?

- Әйе. Әмма зур “солянка” концертларга автобуска төяп алып баралар.

- Машинагыз кайда “яши”?

- Стоянкада. Өйдән ерак түгел. Аена 1200 түлибез.

- “Спектра”ны сагынмыйсыңмы?

- Без аны танышыбызга саттык. Ул үз бәясенә караганда шулай ук яхшы машина дип саныйм. Машинаны сата башласаң, һичшиксез, авариягә юлыгырсың диләр. Бу ышану безне дә читләтеп үтмәде. Сатабыз дигәндә генә сәгатенә 70 км тизлек белән алдыбызга “Субару Форестер” килеп керде. Ул аварияне Илнар Сәйфиев та күрде әле. Шул тирәдән үтеп баруы булган. 

- Юлда куркынычсызлык каешларын эләктерәсезме? Телефоннан сөйләшмәскә дигән кагыйдәне үтисезме?

- Каешларны һәрвакыт эләктерәбез. Ә телефонга килгәндә, Марат миңа bluetooth җиһазы булган магнитола бүләк итте. Сөйләшкәндә кулларым буш.

- Марат, бер машинаны бүлешү кыен бит. Үзеңә дә алырга җыенмыйсыңмы?

- Җыенам. “Мазда” яки яңа “Фокус” булыр, мөгаен. Алга таба күз күрер.

P.S. Бүген иң арзан “Опель Астра” 447 мең сум тора. Иң арзан “КИА Спектра” – 342 мең.