|
|
Бүген кемнәр туган
|
|
Архив
|
03.06.2011 Мәгариф
Балаларыгыз кайда ял итә?Җәй башланды. Мәктәп укучыларының каникуллары башлана. Ата-аналарның аларга шөгыль табу проблемасы туа. Ә сезнең балагыз быел җәен кайда ял итәчәк? Илүсә СӨНГАТОВА, "Ватаным Татарстан" газетасы сәркатибе:
– Минем малай Казандагы 7нче номерлы лицей-интернатта укый. Ел саен шәһәрдәге татар-төрек лицейларының 7 сыйныф укучылары "Костер" исемле махсус лагерьга бара. Быел минем малай да шунда эләкте. Аларга бер атна дәвамында лицей укытучылары дәрес бирәчәк. Шунда балалар төрек телен тагын да шомартып, белем туплаячак. Укучылар белән бергә класс җитәкчесе, күп кенә лицей хезмәткәрләре дә бара. Гомумән, баланы лагерьга җибәрергә курыкмыйм, чөнки алар янында тәҗрибәле кешеләр булачак бит. Малайга да ул бары тик файдага гына булыр, дип уйлыйм.
Раил САДРИЕВ, Буа сатира театры директоры:
– Узган елда малай белән Франциягә барып кайткан идек, быел июньдә Чехиягә сәяхәт итәргә исәпләп торабыз. Июльдә исә ул сәләтле балалар өчен лагерьга барачак. Аннан соң инде август айларында авылда ял да итәр, эшләп тә алыр. Минемчә, бала җәй көне тик торырга тиеш түгел, ул һәрвакыт хәрәкәттә булса, сау-сәламәт булып үсә. Минем малай футбол ярышларында катнаша, быел җәен дә бу шөгылен онытмас, дип уйлыйм.
Илназ МИНВӘЛИЕВ, җырчы:
– Былтыр ике балам Сочида, Кырым якларында ял итеп кайтты. Быел исә Казан янындагы бер лагерьга барырга җыеналар. Алар икесе дә тхэквондо белән шөгыльләнә, шуңа күрә лагере да шул спорт төренә бәйле булачак. Балалар анда күнегүләр ясап, осталыкларын ныгытачак.
Зөлфәт ХӘЛИМОВ, полиция хезмәткәре:
– Минем кыз һәр елны төрле лагерьга бара. Быел исә инглиз һәм француз телен тирәнтен өйрәнәм, дип Түбән Новгород өлкәсенә китәргә җыена. Бер белмәгән җиргә түгел, анда минем бертуган сеңлем эшли. Ул аны инде соңгы ике ел дәвамында чакыра, быел менә шунда барырга уйлый. Мин каршы түгел, бала яшь вакытта күп нәрсәне өйрәнеп, үз күзе белән күреп кайтырга тиеш. Шуннан соң гына аның дөньяга карашы да яхшы якка үзгәрә, үзенә алга таба тормыш итүе дә җиңеләя. Иң мөһиме, теләсә нәрсә эшләп йөрмәсен һәм начар юлга кермәсен, калганына мин риза.
Мөршидә ГАЛЛӘМОВА, агрофирма хезмәткәре:
– Балаларга ял итү быел тәтемәскә дә мөмкин әле, чөнки яңа йортны яңартырга планлаштырабыз. Әлегә бик зур булмасалар да, эштә ярдәмнәре тими калмас. Былтыр исә берсе мәктәп лагеренда ял итте, икенчесе Мәскәүдәге туганнарда булып кайтты. Авылда эш күп шул хәзер, ял итү өлкәннәргә генә түгел, балаларга да эләкми. Әле менә олы малай минем белән агрофирмага эшкә йөри башлады, миңа ярдәм итә. Үзләре дә каядыр барырга әллә ни ашкынмыйлар, хуҗалыкта кирәк булуларын аңлыйлар. Ярый әле шундый балалар үсеп килә, юкса нишләргә дә белмәс идең.
|
Иң күп укылган
|