Паспортны яңарталар

Ил Хөкүмәте наркоманнарга эшкә урнашырга тыелган һөнәрләр исемлеген раслаган. Алга таба эш эзләүчеләрдән наркотик куллануга тест та сорый башларга мөмкиннәр. Түрәләр моңа әзер булырга киңәш итә.

Татарстанда яшәүчеләр дәррәү кубып чит илгә китмәкче, ахры. Федераль миграция хезмәтенең республикадагы идарәсендә чит ил паспорты ясатырга теләү­челәр саны күплегенә шаккатканнар. Кыйммәтрәк булса да, халык яңа паспортка өстенлек бирә икән. Тиздән исә эчке, ягъни га­дәти паспорт­ка да үзгәреш кертәчәкләр.

Алдагы ел белән чагыштырганда, республикада чит ил паспорты ясатырга те­ләү­челәр саны берничә тапкыр арткан. Ида­рәнең чит ил паспортлары ясау бүлеге җитәкчесе урынбасары Илдар Садриев әйтүенчә, татарстанлылар күбрәк биометрик документка өстенлек бирә. “Заманча паспортны хәтта бер яшьлек сабыйларга да ясаталар. Ел башыннан бирле 50 меңнән артык биометрик документ тапшырдык”, – ди­гән ул. Мәгълүм булганча, яңа чит ил паспорты ясату 2 мең 500 сум тора. Аны гариза тапшырганнан соң, бер ай эчендә әзерләп бирәләр.

Тиздән исә ил гражданины паспортын да яңартачаклар. Премьер-министр Владимир Путин карары ниге­зендә, доку­ментның өченче битендә паспорт иясе турында өстәмә мәгълүмат пәйда булачак. Хә­зер фамилия күрсәтелгән урын­да буш юллар бар. Өстәмә мәгълүматны әнә шунда урнаштырачаклар. “Машина укый алырлык мәгълүмат”ның урыны алдан ук уйланылган иде, дигәннәр илнең федераль миграция хезмәтендә. Анда ке­шенең исем-фамилиясе, туган елы, паспорт мәгъ­лү­матлары булачак. Бу – төрле ве­домст­воларның эшен тизләтү өчен эшләнә, дип аңлаткан белгеч­ләр. Яңа паспорт га­мәлгә кергәч, кеше турында кирәкле мәгъ­лүматны белү өчен паспорт­ның өченче би­тенә махсус җай­ланма куеп карау да җитәчәк. Мондый төр документны быелның 1 ию­леннән үк бирә башларлар, дип көтелә. Хәзерге паспортлар да гамәлдә булу вакыты чыкканчы кулланышта калачак.