ЮЛ БУЕНДА КАЛА ҺӘЙКӘЛЛӘР

Айлар, хачлар, чәчәк бәйләмнәре. Россия юл­ларының күбесе транспорт һәлакәте корбаннарына куелган әнә шундый һәйкәлләр бе­лән чуарланып беткән. Красноярск өлкәсендә моңа каршы көрәш башларга ниятлиләр. Бу да үз чиратында ризасызлык тудырды. Күп кеше фикеренчә, һәйкәлләр яңа юл һәлакәтләре китереп чыгармаска яр­дәм итә.

Красноярск өлкәсе хакимияте юлларны каберташлардан арындырырга тели. Моның өчен аларга, ким дигәндә, 600 һәйкәлне юк итәргә кирәк булачак. Хәер, әлеге өлкә җитәкчелеге юлларны "чистартырга" теләгәннәрнең беренчесе түгел. Матәм билгеләренә каршы моңа кадәр Ленинград, Тула, Тверь, Сверд­ловск һәм Чиләбе өлкә­ләрендә дә көрәшеп караганнар. Җирле хакимият башлыклары инде урнаштырылган һәйкәлләрне сүтеп алырга әмер биреп, яңаларын кую өчен өлкә җитәкчелегеннән рөхсәт алу тәртибен кертергә булган. Ләкин юл хезмәткәр­ләре югарыдан килеп иреш­кән әмерне үтәргә атлыгып тормый. Якыннарын, туганнарын югалткан кешенең ярасына тоз сибәргә җыенмыйбыз ла, ди алар.

Дөрес, бер караганда, хакимият башлыкларының тәкъдименә тел-теш тидереп булмый. "Автомобиль юллары турында"гы закон нигезендә юл кырыена һәй­кәлләр урнаштыру тыелган. "Мондый каберташлар юлдагы хәрәкәткә комачау итәргә мөмкин. Кыш көне исә алар, кар астында калып, өстәмә куркыныч тудырырга мөмкин", – ди Красноярск өлкәсенең ЮХИДИ хезмәткәрләре. Белгечләр исә юл буена урнаштырылган һәй­кәлләрне, киресенчә, уңай күренеш дип кабул итә. Милиция хезмәткәре йә булмаса камера яныннан ыжгыртып узып киткән йөртүче юлдагы чәчәк бәйләмнәре янында гадәттә тизлеген киметә, игътибарын арттыра, ди алар.