Киләчәк кешесе - нинди ул?

Адәм баласын алда нәрсә буласы һәрвакыт кызыксындырып тора. Кемдер моны эшли ала кебек, киләчәктә ни буласын фаразларга алына. Кайберәүләр бу эшкә фәнни яктан тотыналар. Шундыйларны футурологдар дип йөртәләр. Дөресен әйткәндә бу фаразлау куркыныч кино кебек тә булгалый.

Шундый футурологларның берсе Реймонд Курцвейл киләчәктә кеше ничек үзгәрәчәген күрәзәчелек итәргә алынган. Аның фикеренчә, егерме елдан кешеләр хәтерләренең копияләрен ясау сәләтенә ия булачаклар. Махсус җайланмалар турыдан-туры күзгә тәэсир итәчәк, шул рәвешчә кеше виртуаль чынбарлыкка "керәчәк".

Кан системасына меңнәрчә наноробот салыначак, алар "хуҗа"сының сәламәтлеген тикшереп торачак, эш нәтиҗәлелеген арттыруга ярдәм итәчәк.

Махсус  наномашиналар кеше миенә иңдереләчәк, алар аша тышкы системалар белән элемтә урнаштырылачак. Ә 2040 нчы елларда кеше теләсә нинди формага әйләнү сәләтенә ия булачак. Бу бигрәк куркыныч, пластик операцияләр ясатырга яратучылар үзләре белән ни генә эшләп бетермәсләр инде. Эчке органнарны исә кибернетик җайланмалар алыштырачак, имеш.

Кеше, шулай итеп, яртылаш машинага әвереләчәк. Ләкин компьютерлар да кеше сыйфатларын үзенеке итә башлаячак. Курцвейл фаразлавынча, 2029 елда  компьютер Тьюринга тестын уза алачак - кеше дәрәҗәсендә сүзләрнең мәгънәсен аңлаячак. Бу, бәлки, кеше миенең компьютер күчермәсен ясаганда ирешелер.

Аннан соң инде Җир шары үзе дә бер гаять зур компьютерга әйләнеп китәчәк, соңыннан ни булачагын футуролог фаразлый алмыйм ди. Минемчә, бик яхшы, күп белгән саен, яшәве куркынычрак була башлый...