Могҗизалы төстә исән калган сабый

Дөньяда нинди генә искитмәле хәлләр булмый. Шуларның берсен таныш апам сөйләде. Асия 22 яшендә кияүгә чыга. Иренең бераз дорфарак икәнен, кул уйнатырга яратканын белсә дә, яратып, җайланыр әле дип олы тормыш юлына аяк атлый. Озак та үтми, авырга уза. Хәләл җефете — гаиләдә бердәнбер бала. Шуңа үзенә игътибар таләп итә. Уңган-булган хатыныннан көнләшеп, бер юкка тәңкәсенә тиеп бетерә. Салып кайткан вакытларында өйгә дә кертми. Йөкле килеш урамда катып тора Асия апа.

Бу авырлыклар аның сәламәтлегенә тәэсир итә — ике айлык йөге төшә. Ире дә шуны гына көткән кебек, аерылышырга гариза яза. Асия апага тән һәм җан яраларын берүзенә төзәтергә туры килә. Әти-әнисе дә башка өлкәдән. Бирегә иренә ышанып кына килгән була. Тормыш иптәшенең туган-тумачасы болай да кыерсытылган хатынны кире кага.

Шулай, хәлләре җайланып китә, эшенә бата. Берзаман медицина тикшерүе вакытында моңа 7 айлык йөге барлыгын хәбәр итәләр. Асия апа аптырашта кала — биш ай элек баласы төшкән иде, ләбаса. Аннан соң беркеме дә булмады бит аның. Ә ике айдан сау-сәламәт ир-баласы дөньяга аваз сала. Нарасыйның атасы бу хәбәрне ишетеп, Асия апаны мыскыл итәргә килә. Үз баласы булына ышанмыйча, берничә ел дәвамында судлашып бетә. ДНК-анализларын ничә тапкыр, әллә ничә клиникада ясатса да (ире хәлле кеше), нәтиҗәсе уңай була. Димәк, улы Рамилдә ире каны ага.

Хәзер Асия апаның тормышы көйле. Янында ярата торган кешесе, уртак кызлары бар. Ә беренче ире ничә тапкыр өйләнсә дә, беркем белән дә яшәп китә алмаган. Инде чәче агара башлагач кына нәсел дәвамчысы турында уйлана. Ләкин бер хатыны да аңа бала бүләк итми. Ә Асия ападан Рамил белән дуслаштырырга үтенеп йөри. «Улымның әтисе - хәзерге ирем, аны ташлап киткән, минем тугры булуыма шик белдергән кеше түгел. Игезәк туганын югалткач та, яшәргә көч тапкан бит нарасыем. Ул чакта дөньяга килеп, минем тормышымны ямьләндермәсә, ничек түзәр идем соң мин бер ялгызым? Рәхмәт балакаема, яраткан әнкәсе өчен үлем белән көрәшеп, шундый могҗизалы төстә исән калды ул!»- дип елмая бүген Асия апа.