Абруйны ничек күтәреп була?

Иртәгә 1 Май – Яз һәм Хезмәт бәйрәме. Әлеге уңай­дан ил Президенты Дмитрий Медведев “Бердәм Россия” партиясе депутатлары белән очрашып, эшче һөнәре абруен күтәрү хакында сөйләште. Очрашуда хезмәт ияләренә “эштәге батырлыгы өчен” махсус орден булдырырга тәкъдим иттеләр. Депутатлар әйтүенчә, әлеге бүләкне Хез­мәт бәйрәмендә Президент үзе тапшырырга тиеш. Ә сез хезмәт ияләренең абруен ничек күтәреп була дип саныйсыз?

Евгений ЕФИМОВ, Татарстан Дәүләт Советы депутаты:

– Бүген Татарстанда хезмәт ияләренең абруен күтәрү өчен шактый эш башкарыла. Бигрәк тә яшьләргә зур мөмкинлекләр тудырылган. Рес­публикада яшәүче егет-кызларны әлеге тармакка җәлеп итү, аларга ярдәм итүнең аерым системасы бар. Мәшгульлек үзәкләре аша без студентлар хезмәт отрядлары белән җитди эш алып барабыз. Отряд вәкилләре нәкъ эшче һө­нәрләрен үти. Бу – уңай кү­ренеш, дип саныйм. Чөнки студентлар уку йортында алачак белгечлеклә­реннән тыш, эшче һөнәре буенча тәҗрибә дә туплый. Алдынгы хезмәт ияләрен бү­ләкләү өчен аерым орден булдыру турындагы фикер дә бик яхшы. Алар моңа һич­шиксез лаек.

Альбина АДИЕВА, профсоюз комитеты рәисе:

– Ил Президентының әле­ге мәсьәләгә игътибар бирүе мактауга лаек. Әмма хезмәт ияләрен борчыган проблемалар хакында елга бер тапкыр гына сөйләшү аз. Завод-фабрикаларда эшләү­челәрнең яше елдан-ел олыгая. Яшьләр исә авыр эшкә ки­лергә те­ләми. Киләчәк турында уйлыйбыз икән, әнә шул мәсьә­ләне хәл итәргә кирәк. Хезмәт ияләре турында социаль реклама да җит­ми.

Евгения ШИШКОВА, тө­зелеш техникумы директоры урынбасары:

– Мәсьәләне хәл итүнең бер генә юлы бар. Ул да булса, эшче һөнәре ияләренең хезмәт хакларын арттырырга кирәк. Иң авыр, иң кара эш аларга туры килә ич. Акчасын да эшенә күрә түли башласалар, орден-медальләр дә кирәкмәячәк. Яшьләрнең һөнәри техникумга укырга керергә теләмәвенең сәбәбе хезмәт хаклары түбән булуда. Диплом алган белгеч­ләрне эш белән тәэмин итүнең аерым системасын булдыру да көн кадагында тора.

Люция МУСИНА, җырчы:

– Эшләгән кешенең кадерен белергә кирәк. Яхшы эшли икән, Мактау грамотасы бирсеннәр. Күңел әнә шундый вак нәрсәләрдән дә үсә. Ә үзеңә ошаган һөнәр – башкалар өчен дә үрнәк. Хезмәт хакларын арттырсыннар. Орден да комачау итмәячәк. Ә эшнең катлаулы булу-булма­вына килгәндә, кайсыбызның эше җиңел соң? Әллә җитәкчеләр кәнәфидә көнне бушка уздырып утыра дисезме? Юк, аларның эше безнекеннән дә авыррак.