Казанда “Ел китабы” конкурсында җиңүчеләр бүләкләнде

Бүген ТР Милли китапханәсенең уку залында “Ел китабы - 2009” конкурсында җиңүчеләргә дипломнар һәм истәлекле бүләкләр тапшырдылар.

Чараны ТР Дәүләт Советы депутаты, язучы Разил Вәлиев ачты. Ул Рафаэль Мостафин “Ел китабы” конкурсын үткәрүдә актив катнаша иде, күптән түгел ул арабыздан китте, дип искәртте. Бу сүзләрдән соң Рафаэль Мостафинны бер минут тынлык белән искә алдылар.

“Нинди генә сүзләр булуга карамастан, китап гасыры беркайчан да бетмәячәк, - дип тәмамлады Разил Вәлиев. – Интернет беркайчан да китапны алыштырмаячак”. Конкурсның максаты – укучылар мәнфәгатен, республика язучылары әсәрләренә ихтыяҗны өйрәнү, киләчәктә популярлаштыру максаты белән иң күп укыла торган китапларны ачыклау, шулай ук китапханәчеләрне Татарстанда яшәүче төрле милләт кешеләре арасында татар язучылары әсәрләрен актив пропагандалауга җәлеп итү.

“Ел конкурсы”на барлыгы 114 китап тәкъдим ителгән: аларның 28 е – татар телендә язылган проза, 36 – татар шигърияте, 26 балалар китабы, 24 китап рус телендә нәшер ителгән. Иң күп укыла торган китапны ачыклауда ТРның 45 үзәкләштерелгән китапханә системасы катнашты. 2011 елның 7 апрелендә жюри конкурска нәтиҗә ясады һәм җиңүчеләрне ачыклады.

“Татар телендә проза” номинациясендә беренче урынга Мөхәммәт Мәһдиевнең 5 томлык “Сайланма әсәрләре” лаек булды; икенче урында Зифа Кадыйрованың “Көтеп узган гомер” китабы; өченче – Халисә Ширмәннең “Язмыштан качып булмый” китабы.

“Татар телендә шигърият номинациясендә беренче урынга Гамил Афзалның “Рәхмәт!” китабы чыкты; икенче – Мөхәммәт Мирзаның “Адәм баласы” китабы; өченче урында – Радиф Гаташның “Сайланма әсәрләре” өч томлыгы.

Балалар әдәбияты” номинациясендә Габдулла Тукайның “Шүрәле” китабы (1 урын), Балалар энциклопедиясе. 1 китап (2 урын); Фаяз Хуҗинның “Кол Гали. Кол Шәриф. Сөембикә”, Гамирҗан Дәүләтшинның “Борын-борын заманда…: Миф, дин, сәнгать” китабы (3 урын).

Иң яхшы “Рус телендә матур әдәбият өчен” номинациясендә Михаил Туруновский “Сказки для маленькой дочки” (1 урын); “Казанский альманах” (2 урын) китаплары өчен бүләкләнде.