Татарда яңа төр кичәләр

Моңарчы Казан яшьләре арасында зур популярлык казанырга өлгергән XL Club татарларга йөз белән борылды. “Аксу” студиясе тырышлыгы белән монда даими рәвештә татар кичәләре уздырылачак. Шуларның якындагысы 27 апрель көнне көтелә. Концерт та түгел бу, корпоратив кебек нәрсә дә түгел. Бу – яңа төр кичәләр.

Төп максат – кунакларга җылы, дустанә атмосфера булдыру. Әйтерсең, һәр кеше бер-берсен белә, бер-берсе белән дус. Клуб форматындагы аралашу, ягъни мәсәлән. Танылган татарлар да чакырылган ди. Бу кызыклы тәкъдимне берсе дә кире какмаган. Димәк, кичәдә җыр, уеннар, шаян сүз күп булачак.

“Аксу” студиясе җитәкчесе Рөстәм Сәрвәров әйтүенчә, алга таба XL Club-та төрле презентация чаралары да уздырмакчылар. Мәсәлән, альбом чыгу, яңа клип, яңа мода коллекциясе булдыру уңаеннан. Тәкъдир итү чаралары өчен бу клуб бик кулай, чөнки кунакларга аралашу мөмкинлеге бик уңайлы, ә һәрбер өстәл янында диярлек телевизион монитор бар.

Кыскасы, үзегез килеп күрегез – Ямашев урамында урнашкан “XL” сәүдә үзәгенең 3 каты – XL Club.