СЕЗ ПӨХТӘМЕ?

Хатын-кызның пөхтәлеге белән психологлар гына түгел, астрологлар да кызыксына. Күзәтүләр үт­кәргәннән соң, алар бик кы­зык нәтиҗәгә килгән. Баксаң, кешенең кайсы йол­дызлыкта тууы аның пөх­тәлегенә тәэсир итә икән.

Кучкар. Сезнең өйдә һәр­вакыт тәртип. Өй җыештырырга, кием-салымны тәртипкә китерергә яратасыз. Дөрес, һәрдаим дип әйтеп булмый. Аның каравы, сез бу эшне чын кү­ңелдән башкарасыз.

Үгезбозау. Чисталыкны яратасыз, тик ялкаулыгыгыз сезне харап итә. Теләк кенә булсын, хәзер бөтен дөньяны тәртипкә китереп ташлыйсыз. Теләгегез булмаса, шкафлардагы тузан орлык чәчәрлек булып калыная.

Игезәкләр. Өй җыештыруны сез бүлмәне җиллә­түдән башлыйсыз. Кыскасы, сез бар эшне тәртип белән башкара беләсез.

Кысла. Бөтен җирдә пөхтәлек: китаплар тип-тигез итеп тезелгән, кием-салымның үз тәртибе. Чисталык яратасыз. Яшәү урынын сез ниндидер бер җан иясе кебек кабул итәргә күнеккән.

Арыслан. Сезне өй җыештырырга мәҗбүр итү бик кыен. Шулай да эшне башласагыз, ахырына кадәр җиткерерлек ихтыяр көче табасыз.

Кыз. Кызлар ике төрле була: йә җыйнаксыз, йә пөхтә. Икесе дә чиктән тыш дәрәҗәдә. Пөхтә Кызлар чиста кием-салымны да юа, үтүкли. Аларның күп вакыты юк тузанны сөртеп үтә.

Үлчәү. Сез пөхтәлек яратасыз. Тик ул сездә озак “кунак” булмый. Өйне күз ачып йомганчы тәртипкә китерәсез, шул арада ук туздырып та ташлыйсыз. Идеаль чисталык барыбер була алмый, дигән принцип бе­лән яшисез.

Чаян. Бик шәпләп тәртип кертергә яратасыз. Җыештыру эшенә сез теләсә кемне тарта аласыз. Девизыгыз: “Иң мөһиме — оештыра белү, кушканны үтәрдәй кешеләр кайда да табыла”.

Укчы. Өегездә берәр вакыт тәртип урнашканы бармы икән? Шулай да кайвакыт үзегезне җиңеп, эшкә тотынган чакларыгыз була.

Кәҗәмөгез. Хатын-кызларның иң пөхтәләре шушы йолдызлык астында тугандыр, мөгаен. Кайда да: өйдә дә, эштә дә, сумкада да тәртип булырга тиеш. Башлаган һәр эшегезне ахырына җиткерәсез.

Сукояр. Сез — иҗат кешесе. Шуңадырмы, өегездә һәрвакыт иҗади тәртипсезлек хөкем сөрә. Сезне  җыештырырга мәҗбүр итеп тә булмый хәтта. Теләгегез юк икән, аркылы ятканны буйга да алып куймаячаксыз.

Балык. Тәртип һәм чисталык яратасыз. Йортыгыз һәрвакыт ялтырап тора.

P.S. Астрологларның бәяләмәсе нәкъ менә сезгә туры килмәскә дә мөмкин. Бөтен кешене бер кысага куып кертеп булмый.