Бөтен авыл елый. Дүрт бала әнисез калган

Шушы көннәрдә Әгерҗедә узган мари бәйрәме Семыктан өйләренә – Уразай авылына кайтканда өч хатын-кыз һәм ике бала утырган машина юл фаҗигасенә эләгә. Машинаны йөртүче Ләйсән Гарифуллина шунда ук вафат була. Янәшәсендә утырып барган игезәк улларының берсенең хәле бик авыр. Артта утырган ике ханымның да аяк-куллары сынып беткән. Ә менә игезәк малайларның икенчесенә, шөкер, берни булмаган.

 

– Ләйсән яшь булса да, күпне күрде инде ул. Кияүгә чыгып, матур гына яши башлаган иде. Бер кыз, бер уллары туды. Тик, кызганыч, киявебезнең башында яман чир таптылар. Ул кыска гомерле булды. Соңрак сеңлем икенче тапкыр кияүгә чыкты. Айдар белән аларның ике игезәк уллары туды. Тик бу киявебез дә кыска гомерле булды. Балаларга өч яшь чагында юл фаҗигасендә һәлак булды, – ди абыйсы Дамир Мулләхмәтов. – Хәзер менә үзе дә юк. Ул көнне бәйрәм булгач, ул ике малае белән шунда киткән. Янәсе, күңел ачып кайталар. Кайтыр юлда машиналарына тагын ике хатын-кыз да утырган. Фаҗиганең нечкәлекләрен белмим, тик шунысы билгеле: сеңлем юл кырыена очкан.

 

Ләйсәннең олы кызы кияүдә, өченче бәбиен көтә икән. Улы армия сафларыннан кайтып, әнисе белән бергә яшәгән. Ул әле өйләнмәгән. Альмир белән Альфирга – 12шәр яшь.

 

– Ул балаларны мин баянга өйрәтә башлаган идем. Альмирыбыз, бер җирем дә авыртмый, дисә дә, хастаханәгә алып барып күрсәтергә җыенабыз. Сабый шок хәлендәдер, дибез. Альфирның гомере өчен табиблар көрәшә. Сабыйның талагы өзелгән. Ул реанимациядә. Исән-сау савыга күрсен инде, – ди Дамир абый.

 

Әтисез үскән дүрт сабый инде бердәнбер юанычлары, терәкләре – әниләрен югалтты. Ничә яшьтә булсаң да, әни кирәк! Дүртесе дә кызганыч. Буй җиткән балалары үз тормышын көтәрләр дә, кечкенәләр нишләр?

 

– Аларның әтиләренең сеңлесе бар. Гел аралашып яшәделәр. Альмир да, Фәридә апаларда яшибез, дигән. Алар сабыйларны алырга каршы түгел. Без дә ташларга җыенмыйбыз. Бу авырлыкны бергә-бергә ничек тә күтәрербез дип уйлыйм, – ди Дамир абый. – Ләйсәннең бик тә рульгә утырасы килде. Берничә ел элек «права»га укыды. Шул машина алып китте дә инде үзен…

 

Авылдашлары Ләйсәннең гаиләсенә ярдәм итү максатыннан акча җыя башлаган. Бу акча игезәк малайларга тотылачак. Булышырга теләүчеләр өчен Дамир Хаҗиәхмәт улы  Мулләхмәтов исемендәге Саклык (СБЕР) банк картасы 89172638867 номерына беркетелгән.