Казанда «ӘйдәБас» татар биюен үстерү остаханәсе узачак

20-21 май көннәрендә Г.Кариев исемендәге Казан татар дәүләт яшь тамашачы театрында Яшьләр эшләре буенча Федераль агентлык (Росмолодежь), ТР Яшьләр эшләре министрлыгы ярдәме белән «ӘйдәБас» татар биюен үстерү остаханәсе фестивале узачак.

Фестивальнең бурычлары – шәһәр халкына һәм кунакларына татар биюенең нинди төрле, бай һәм кызыклы була алуын күрсәтү. Күпләр татар биюләрен Татарстан Республикасы халкы гына түгел, ә илебез территориясендә яшәүче татарлар да (Әстерхан, Самара, Себер, Пермь, Урал һ. б.) биегәнен белми. Әле алай гына да түгел: һәр татар этнографик төркеменең биюе үзенчәлекле. Аларның һәрбесенең үз хәрәкәтләре, костюмнары, музыкасы һәм тарихы бар!

Фестиваль программасында:

- «ӘйдәБас» татар биюен үстерү остаханәсе проекты хореографлары һәм катнашучыларыннан татар биюен тәкъдим итү;
- «Кичке уен» – татар халык уеннары;
- Самара татарлары турындагы легенда мотивлары буенча перформанс;
- Проектның белем бирү атнасы турында фотокүргәзмә;
- Казан паркларында чыгышлар;
- Г.Кариев исемендәге Казан татар дәүләт яшь тамашачы театры сәхнәсендә Фестивальнең гала-концерты.

Фестиваль программасы белән тулырак «ӘйдәБас» проектының рәсми төркемендә танышырга мөмкин: https://vk.com/public214078837

Гала-концертка билетлар сатуда: https://tickets.karievteatr.ru/event/?id=1370