|
|
Бүген кемнәр туган
|
|
Архив
|
25.03.2011 Шоу-бизнес
Көмеш тавышлы малайУн яшьлек Зөлфәт Габдуллин Американың Лос-Анджелес шәһәрендә "Young Artist Awards" тантанасында 2010 елның иң яхшы чит ил җырчысы булып танылды. Әлеге премияне халыкта "Балалар Оскары" дип тә йөртәләр. Заманында бу бүләкне Джулия Робертс, Майкл Джексон да алган. Зөлфәт нәкъ менә Майкл Джексон кебек бөек артист булырга хыяллана да инде. Нәни йолдыз, мин бәхетле булачакмын, дип тә өсти. Яңгыравыклы саф көмештәй тавышлы малай әнисе Гөлшат ханым белән кунакта булды, Америкадан алган хис-кичерешләре белән дә уртаклашты.
– Зөлфәт, йолдыз булу җиңелме?
– Авыр да, җиңел дә димәс идем. Ул минем яшәү рәвешем. Дүрт яшьтән бирле җырлыйм. Алдан Абдулла Алиш исемендәге балалар иҗаты йортында хорда җырладым. Аннан укытучылар вокал дәресләре алырга киңәш иттеләр. Бүген минем белән вокалдан – Зөлфия Вәлиева, хореография буенча Лилия, Айрат Баһаветдиновлар шөгыльләнә. Минем җиңүемдә аларның да өлешләре зур.
– Америкадан нинди тәэсирләр белән кайттың?
– Мин әкиятләр шәһәренә эләктем дип торам. Барысы да бик ошады. Дисней мультфильмнары иҗат ителгән бинаны да, "Кин-Конг" фильмы төшерелгән урынннарны да күрдем. Безнең кунакханә тәрәзәләреннән океанны күреп була иде. Ә премия өчен көрәшкәндә көтелмәгән борылышлар да булды. Концертка бер көн кала минем җырымны алмаштырдылар. Ярый әле анда тамашачы бик яхшы. Аларның һәр чыгыш өчен борчылуларын тоеп тордым. Мин анда "Школа закрыта" дигән җырны алып барган идем. Сайлап алу комиссиясе дисктагы африканча җырны ошаткан. Ә без аны номер буларак әзерләмәгән дә идек. Алай да мин көндәшләрем – Һиндстаннан килгән малайны һәм Бөекбританияле кызны уза алдым.
– Гөлшат ханым, Америкага барачагыгыз кайчан мәгълүм булды?
– Барысы да продюсер Саймон Берн белән танышудан башланды. Ул безне Санкт-Петербургта узган "Балалар радиосы" дискотекасында күреп калган икән. Зөлфәт анда "Школа закрыта" дигән җырны башкарган иде. Нәкъ менә ул безнең әлеге премиянең балалар номинациясенә кертелгәнебезне хәбәр итте. Дөресен генә әйткәндә, андый премиянең барлыгын да белмәгән идек.
– Зөлфәт, татар җырларын җырлыйсыңмы?
– Әле күптән түгел генә "Шахта" көен өйрәндем. Ул минем Шәйхулла бабама бик ошый. "Җомга көе"н, "Диңгезче" кебек җырларым бар.
– Беренче мәртәбә җиңү тәмен кайчан татыдың?
– Биш яшемдә "Йолдызлык"та җиңгәч. Хәзер мин татар, рус, инглиз телләрендә, хәтта африканча да җырлыйм.
– Гөлшат ханым, баланың мондый тормыш ритмын хәтта олылар да күтәрә алмас иде. Сезнеңчә болай яшәү дөресме?
– Мин дөрес дип уйлыйм. Урамда күпме трай тибеп йөрүче, туарылган бала-чага, яшьләр бар. Сезнеңчә, болай дөресме? Ә бит сәләт һәрберебезгә бирелә. Әмма аны үстерү күбрәк әти-әнидән тора. Нәкъ менә педагог табу, бәйгеләргә әзерләү эшләре ата-аналарга төшә. Без нәрсәне булдыра алабыз, шуны эшлибез. Баланың алҗыганын күрсәк, ял бирәбез.
– Укуга вакыт каламы, Зөлфәт?
– Миңа классташларымны каникулда куып җитәргә туры килә. Болай яхшы билгеләренә укып барам. Иврит, инглиз телләрен әйбәт беләм. Бәйгеләр мине алҗытмый. Киресенчә, стимул бирә. Әле мин "Новая волна" кебек конкурста да катнашырга телим. Ә апрель башында "Русское радио"ның Мәскәүдәге Лужники стадионында оештырган концертында катнашам.
– Майкл Джексон кебек булам дигән идең, аның атаклы "лунная походка"сын өйрәндеңме соң?
– Өйрәнә башладым. Мин аны яңа төсмерләр белән баетачакмын.
|
Иң күп укылган
|