|
|
Бүген кемнәр туган
|
|
Архив
|
01.08.2008 Юмор
ТАТАР МАТБУГАТЫНДА ТАТАР ҖЫРЧЫСЫ БЕЛӘН ТИПИК ИНТЕРВЬЮ
– Сез эстрадага ничек килеп кердегез?
– Мин инде 2 яшемнән үк җырлыйм. Әнием сөйләвенчә, инде шул вакытта ук нидер көйләп йөргәнмен. Аннары 5 яшемдә тагын да зуррак үрләргә мендем: тарак микрофон тотып күршеләргә концерт куйдым. Ә зур сәхнәгә менү ул инде, әлбәттә, 8 яшьтә булды. Авыл Сабан туенда.
– Бүгенге татар эстрадасын ничек бәялисез?
– Бүген моң дигән әйбер югалды. Моң бит ул башка телләргә тәрҗемә ителми, беләсегез килсә. Ә мин үз җырларымда моңга зур игътибар бирәм. Менә кичә “Моңлы көй” дигән җыр яздырдым әле. Өченче көнне “Җырлы моң” дигәнен яздырган идем.
– Башка җырчылар белән дусмы сез?
– Миннән барысы да көнләшәләр. Миңа кызыгалар. Татар эстрадасында бик күп җырчы миңа охшатып җырлый. Темаларымны да урлыйлар. Менә, әйтик, “авыл”, “әнкәй”, “дуслар”, “туган көн” темаларын бик күп урладылар.
– Сезнең тыңлаучыларыгыз бик күптер.
– Әйе, мине Президентыбыз да бик яратып тыңлый икән. Бер райондагы Сабантуйда җырлаганда ул миңа президиумнан кул болгады. Үзем күрдем!
– Татар телевидениесенә карашыгыз.
– Бүген татар телевидениесы бик артта калган. Анда минем җырларымны әйләндермиләр.
– Ә татар юморы?
– Татарда юмор юк ул! Ә менә Башкортстанның бер районыннан килгән Фәсмәтән Фәләновның шаяруларын ишеткәнегез бармы? Халык көлүдән туктый алмыйчы залдан чыгып-чыгып китә. Җырчы чыкканда инде берәү дә калмый. Фәсмәтән Фәләнов – минем концертларымның алып баручысы.
– Техник яктан иҗатыгызны камилләштерәсезме?
– Әйе, җырчы ул һәрвакыт заман белән бергә атларга тиеш!
– Интернетта сайтыгызны булдырырга исәбегез юкмы?
– Ә нәрсә ул интернет?
– Аңлашылды. Ә “фанера”га ничек карыйсыз?
– Беләсезме, минем аңа карашым бик тискәре! Ну күпме түзәргә була инде! Фанера бит ул сыйфатсыз, очсыз дигәнне аңлата! Инде күптән ДСП белән гипсокартонга күчәргә вакыт!
– Татар җырчысының бүгенге матди хәлен ничек бәяләр идегез?
– Әгәр дә бөтен законнар да үтәлсә, татар җырчылары инде күптән баеп беткән булырлар иде. Әнә бит Мәскәүдә миллионнар, чит илдә миллиардлар алалар. Ә без ярлы.
– Күрәм, машинагызны алыштыргансыз икән...
– Әйе шул, авылга кайтырга джип уңайлырак. Узган айны 4 бүлмәле фатир алган идек. Кече кызга. Шуннан акча калды да, алыйм әле минәйтәм бер машина...
– Авылыгызга еш кайтасызмы?
– Ничек инде кайтмаска! Ул бит безнең туган як. Ел саен кайтып киләм!
– ГАИ хезмәткәрләре сезне таныймы?
– Әлбәттә! Беркайчан да штраф түләттермиләр. Менә бер көнне туктатканнар иде. Берсе хәтта фуражкасын бүләк итеп җибәрде.
– Быелгы ялны ничек уздырдыгыз?
– Башта Италиягә, аннары Франциягә, аннары Кипрга бардык.
– Яхшы ял иткәнсез икән...
– Нинди ял, што син! Тиргә батып эшләдек! Клип төшердек. Чит илгә чыга алмаган авыл халкы дөньяның бөтен матурлыгын күрсен дип...
– Балаларыгызның җырчы булуын теләр идегезме?
– Юююк!!! Җырчы бит ул эт тормышы! Бик зур хезмәт! Аны дошманыңа да теләмәссең...
– Балаларыгызда җырлау сәләте юкмы соң?
– Бар. Бик матур җырлыйлар. Икесенең дә “абсолют слух”. Аларны минем концертларымда да тыңларга була.
– Киләчәккә планнарыгыз нинди?
– Менә хит булган бер җырыма клип төшерергә исәплим әле. Аннары Казан залларының берсендә концертымны оештырып булмасмы дигән өмет белән янып карамаска микән әллә дигән уйлар килеп китә башыма. Әмма боларның барысы да әлегә сер булып калсын...
--- |
Иң күп укылган
|