13.04.2023 Җәмгыять

Өченче балага ана капиталы биреләме?

"Олы улыма 20 яшь. Икенче балама 12 яшь. Аңа бирелгән Ана капиталы акчасына Зәйдә йорт алдык. Хәзер өченче сабыебыз туды. Аңа Ана капиталы тиеш түгел, диделәр. Хәзер өченче балага да Ана капиталы бирелә түгелме соң?" - дип Зәй районыннан шалтыраттылар.

Сорауга Татарстанның Социаль фонды матбугат хезмәте җитәкчесе Альбина НИКАНДРОВА җавап бирде:

— Закон буенча, гаиләдә туган икенче балага бирелгән Ана капиталын сез куллангансыз. Яңа кагыйдәләр нигезендә, 2020 елның 1 гыйнварыннан соң туган (уллыкка алынган) балаларга да Ана капиталы каралган. Әгәр гаилә моңа кадәр Ана капиталын кулланмаган булса, ул тулы күләмдә 775 600 сум итеп бирелә. Әгәр Ана капиталы бер алынган һәм 2020 елдан соң тагын бер бала туган очракта, 188 681 сум өстәп бирелә. Икенче улыгыз 2020 елга кадәр туган. Димәк, бу закон сезгә кагылмый. Өченче балага Ана капиталы каралмаган. Дөрес, төбәк программасы нигезендә, торак шартларын яхшырту өчен дәүләт ярдәме бирелә. Әмма бу социаль фондка кагылмый.

Редакциядән:

— 2019 елның 1 гыйнварыннан соң өченче һәм аннан соңгы балалары туган гаиләләргә дәүләттән 450 мең сум акча бирелә. Ул фатир, җир кишәрлеге, шәхси йорт алуга рәсмиләштерелгән кредитны каплар өчен кулланыла ала. Кредит килешүе 2024 елның 1 июленә кадәр имзаланган булуы шарт.

Фото: фрипик.ком

---
Ирек мәйданы
№ --- | 13.04.2023