Яшел Үзән районында танылган мөселман хәйриячесе Әхмәт-бай Хөсәенов исемендәге мәчет төзеләчәк (ФОТО)

17 мартта Яшел Үзән районының Малые Ключи авылындагы «Ханнар утравы» коттедж бистәсендә яңа мәчет төзелешенә старт бирелде. Ул танылган татар мөселман иганәчесе Әхмәт-бай Хөсәенов исемен йөртәчәк.

Ун ел дәверендә Әхмәт Гали улы Хөсәенов (Әхмәт-бай) Казанда 20 мәчет һәм мәдрәсә бинасы төзегән, 40 мәктәптә мөгаллимнәрнең эшен тәэмин иткән, 200 мәктәпне кирәкле дәреслекләр белән тәэмин иткән. Гомеренең азагында хәйрияче милли мәгариф ихтыяҗларына ярты миллион сум акчасын васыять итеп калдырган.

Яңа мәчет төзелешенә беренче таш салу тантанасында Яшел Үзән районы башлыгы Михаил Афанасьев, «Ханский дом» төзелеш компаниясе җитәкчесе, танылган хәйрияче Ильяс Гыймадов, «Кеше приюты» социаль проекты җитәкчесе Азат Гайнетдинов, Яшел Үзән мөхтәсибәтенең Большие Ключи авылы мәчете имам-хатыйбы Рамил Хәкимҗанов, Большие ключи авылының Иоанн Богослов чиркәве протоиерее Константин, дини һәм җәмәгать эшлеклеләре катнашты. Кунаклар мәчетнең беренче субаена үз имзаларын куйдылар. Беренче субай тәкбир әйтеп кагылды.
Михаил Афанасьев сүзләренчә, яңа мәчет төзелешенә беренче таш салу Район тормышы өчен зур вакыйга.

- Изге Рамазан ае алдыннан Әхмәт-бай Хөсәенов исемендәге мәчет төзелеше башлану якын-тирәдәге авыллар халкы өчен дә, шулай ук бистәдә яшәячәк халык өчен дә зур бүләк булды. «Ханский дом» компаниясе җитәкче Ильяс Гыймадовка игелекле эшләре өчен һәм безнең район тормышына бәяләп бетергесез өлеш керткәне өчен рәхмәт белдерәм, - дип билгеләп үтте район башлыгы.

Ильяс Гыймадов шәхси очрашу вакытында Татарстан мөфтие Камил хәзрәт Сәмигуллинның хәер-фатихасын алуы турында хәбәр итте. Ул шулай ук район җитәкчелегенә һәм шәхсән Михаил Афанасьевка проектларны хуплаулары өчен рәхмәт белдерде.

- Мәчет ачылуны якындагы авыллар халкы да, «Ханнар утравы» бистәсе халкы да көтә. Безгә бу хакта күп мөрәҗәгатьләр килде. Без мәчет кенә түгел, ә тулаем бер комплекс төзергә телибез, ул үз эченә гыйбадәт йортын да, мәдрәсәне дә алачак. Рөстәм Миңнеханов күп тапкырлар «хәләл тормыш рәвеше (лайф стайл)» булдырырга кирәклеге турында сөйләде. Без бу юнәлештә эшебезне дәвам итәчәкбез”, - диде Ильяс Гимадов.

Мәчет хай-тек стилендә проектлана. Аның гомуми мәйданы якынча 260 кв.метр. Манара аерым урнашачак. Шунда ук күзәтү мәйданчыгы да төзеләчәк. Төзелешне 2024 елда тәмамлау планлаштырыла. Проектның бәясе 26 млн сум тирәсе. Киләчәктә мәчет янында уку биналары урнаштырырга планлаштыралар.