23 йортны су басты (ФОТОЛАР)

Афәттән саклану өчен кайберәүләргә тиз арада йортыннан чыгып чабарга туры килгән.

 

Халык куркуда әлбәттә. Су бер китә, көннәр җылы торгач, өстәп яңгырлар да яву сәбәпле кабат килә. Тик күбәеп, ташкынланып, куркытып... 

Радищево район хакимияте башлыгы урынбасары Азат Кудлахметов белән элемтәгә кереп, хәлләрен сораштык. 

 

– Соңгы елларда язгы ташуларның мондый дәрәҗәдә үк зыян салганы булмады. 22 ел элек, ягъни 2001 елда нәкъ шундый ташу күзәтелгән иде. Белмәдек түгел, без берәр атна алдан әзерләндек. Су китү юлларын да борауладык, бозларның тыгылу куркынычын да карадык. Ләкин ул без көткәннән дә зур тизлек белән килеп басты, дәрья кебек җәелде. Көньяк-көнбатыштан, ягъни Саратов ягыннан килеп кергән җылы циклон аркасында кинәт җылытты. Төнлә +8, көндез +10 градус җылы торды. Кар сулары да агып төшкәч, Березка елгасы ярларыннан ташыды. 10 март көнне 23 йортны су басты. Бер йортта олы яшьтәге әби яши иде, борчылды да, кайгырды да, хәле авыраеп киткәнгә без аны хастаханәгә озаттык. Калган гаиләләрне туганнарына күчердек. Су 12 сәгатьләп торды да, китә башлады. Җиңел суларга да өлгермәдек, төнлә кабат килеп басты. Икенче дулкынында ул 118 йортны камап алды. 236 кеше йорт-җирен калдырып чыгып китте, табигать казасына каршы барып булмый. Без аларны туганнарына күчердек. 23 йортның идәннәреннән су күтәрелде, өйдә су ерып йөри торган, ә калган йортларның ишегаллары, идән аслары суда. Якшәмбедән дүшәмбегә кергән төнне яңгыр иште, кар да күпләп эреде, яңгыр сулары да кушылды, хәзер 130лап йорт суда утыра. Китәр исәбе күренми, ташу сулары күпмегә тоткарланыр... Радищевоны өч елга юа – Березка, Терешка, Маза. Терешка белән Маза елагалары да ярларыннан ташып җәелде. Березка елгасы ярларыннан 2 метрга күтәрелде. Табигать бәласе вакытында ярдәм итәргә тиешле барлык төр техника да әзерлектә, кизү торалар, – диде Азат Кудлахметов.

 

 

Мәктәп ягы судан имин булса да, укулар туктатылган. Балалар язгы каникул ялында. 

 

Иске Кулаткы авылы да якшәмбе төнендә ташу сынавына дучар булган. Җылы төндә туктамыйча яуган яңгыр бәласе булып, Кулаткы елгасы да ярларыннан ташыган. Кара исәп белән 30лап йорт халкын махсус техника ярдәмендә район мәдәният йортына күчергәннәр. 

 

 

– Күбесе туганнарында әлбәттә, ләкин, тукталыр урыннары әзер, мәдәният йортында җылы ризык көйләнгән. Бер генә оешма да читтә калмады, кискен хәл белән көрәшүдә зур активлык күрсәттеләр. Рупордан сөйләп тордык, су баскан урамнарга трактор белән кереп, бәлага дучар гаиләләрне утыртып алып чыктык, – дип хәбәр итте Ульяновск өлкәсенең Кулаткы районында нәшер ителә торган “Күмәкле көч” газетасының өлкән журналисты Рөстәм Арифуллин.

 

Сөенечле хәбәр шул – Иске Кулаткы авылыннан язгы ташкыны инде китү ягына борылган, димәк, афәттән саклану сәбәпле тиз арада кулына ни эләкте шуны алып, йортыннан чыгып чапкан Радищево авылы халкы да тиздән үз өйләренә кайтачак... Ә анда тау кадәрле мәшәкать көтә. Килгән зыян өчен иминият түләүләре артыннан йөрисе. Йорт-җирне иминиятләштергән булсалар, билгеле. 

 

– Йорт-җирен иминиятләштермәгән кешеләргә өлкә бюджетыннан ярдәм сорап, тиешле белешмәләр тутырып җибәрәчәкбез, – ди Азат Кудлахметов.