15.03.2023 Язмыш

"Өченче тапкыр дәү әни булдым. Әтисе генә юк..."

“Менә, улым-бәгырькәем, тагын бер айның 15 нче көне килеп җитте. Сине югалтканнан соң, газаплы, кайгылы, сагышлы 5 ай үтте... Белсәң иде, бәбкәем, сине ничек сагынганымны. Эх, бер генә күрергә, җанга якын тавышыңны бер генә тапкыр ишетергә иде. Никләр генә улымны алдың соң?” — дип көн дә елый, улына багышлап хатлар яза Лилия апа Абдуллина.

Мөслим районыннан Рамил Абдуллинның фаҗигале төстә һәлак булуы турында газетабызда (3 ноябрь, 2022 ел) хәбәр иткән идек. Ул 2022 елның 15 сентябрендә юл-транспорт һәлакәтендә җан биргән.

Язмыштан узмыш юк, күрәчәкне күрми гүргә кереп булмый диюләре хактыр.

— Үз гомеремдә югалтулар артык күп булды. Әтисез үстем, япь-яшь килеш ирсез калып, балаларымны аякка бастырдым, газиз әнкәем бик иртә китте. Җанымнан да артык күргән баламны да тартып алу ник кирәк булды соң сиңа, язмышым? — дип өзгәләнә Лилия апа.

Ике бала әтисез, Ләйсән өченче сабыена көмәнле килеш тол кала. Әмма нык, сабыр хатын балалары хакына үз-үзен кулга алырга көч таба.

— Сөенечле яңалыгыбыз бар, — дип уртаклашты Лилия апа, соңгы шалтыратуыма җавап итеп. — Өченче тапкыр дәү әни булдым. Принцессабыз бар. Ике абыйсына куаныч. 17 февральдә дөньяга килде ул. Авырлыгы — 2940 г, буе — 50 см. Сөбханалла. Мәдинә дип исем куштык. Кода-кодагыем, Аллага шөкер, һәрчак киленем Ләйсән янында. Бәләкәчебезне Шуганка авылына алып кайттык. Әтисе генә юк...

Сүз уңаеннан, Ләйсәннең олы улы — авыру. Физик мөмкинлеге чикле сабый тәрбияләүнең авырлыгын үз йөрәге аша кичергән, үзәге өзелгән ана гына аңлыйдыр. Ләйсәнгә бетмәс-төкәнмәс сабырлык, көч-куәт телик.

Гаиләгә ярдәм итәргә теләүчеләр өчен “Сбербанк” картасына тоташкан телефон номеры: 8-987-279-26-14 (Ләйсән Абдуллинаның әтисе Фоат Кыям улы исемендә).

Залинә КӘРИМОВА
Ирек мәйданы
№ --- | 15.03.2023