Танылган җырчы Айдар Галимов Башкортстан депутаты булды

Бу хакта Башкортстан Үзәк сайлау комиссиясенең кичә узган сайлаулар нәтиҗәләрен игълан иткән утырышында бәян ителде.

Танылган җырчы, Башкортстанның атказанган һәм Татарстанның халык артисты Айдар Галимов Башкортстан Дәүләт Җыелышы-Корылтайга депутат итеп сайланды. Бу хакта Башкортстан Үзәк сайлау комиссиясенең кичә узган сайлаулар нәтиҗәләрен игълан иткән утырышында бәян ителде.

Айдар Галимов узган елның декабрь азагында 45нче Иглин сайлау округыннан депутатлыкка намзәт итеп теркәлгән иде. Кичәге сайлауларда барлык сайлаучыларның 86 проценттан күбрәк тавышын алуга ирешкән ул. Шулай итеп, Айдар Галимов элекке президент Мортаза Рәхимовның улы Урал Рәхимовны алмаштырды. Мәгълүм ки, былтыр яз Башкортстан парламенты депутатлары Урал Рәхимовны депутатлыктан төшергән иде.

Урал Рәхимовның депутат урыны моңа кадәр буш кала килде. Хәзер инде менә бер мандатлы 45нче Иглин сайлау округыннан депутат итеп “Айдар” театр-студиясе җитәкчесе, танылган җырчы Айдар Галимов сайланды. Айдар Галимовны депутатлыкка “Бердәм Россия” фиркасе үз намзәте сыйфатында тәкъдим иткән иде.

Танылган җырчы бүген “Татар-информ” хәбәрчесе белән булган әңгәмәдә, үз сайлаучыларының өмет-ышанычларын аклау өчен кулыннан килгәннең һәммәсен дә эшләячәген әйтте. Парламент эшчәнлегендә ул аеруча мәдәният мәсьәләләрендә үз тәкъдимнәре белән чыгыш ясаячак. Айдар Галимовны күпләр җырчы буларак кына белә. Ләкин аның югары юридик белеме дә бар.