Питрәч районында фаҗигадә зыян күргән ана белән баланың ни хәлдә булуы билгеле

— Гаилә кош-корт асрый иде. Алар йорттан читтәрәк булгангадыр инде, шөкер, зыян күрмәгәннәр. Бәйдәге этләре дә исән-сау. Хуҗаларын эзләгәндәй, көлгә әйләнгән йортка моңсу күзләре белән карап тора, мескен. Кичә генә йөгереп йөргән өч сабыйны, әтиләрен кара пакет капчыкларга салып алып китүләрен күреп, йөрәк өзгәләнде. Урыннары җәннәттә булсын, бик авыр хәл, — ди күршеләре.

 

Янгынны үз күзләре белән күрүчеләр бу хәлне куркыныч төш кебек искә ала.

 

— Тәрәзә янында басып торган Аленага бер күршесе: “Баланы ташла!” — дигән. Сабыйны тотып алганнар. Аннары үзенә сикерергә кушкан, “Алайса, үләсең”, — дигән. Уңайсызрак барып төшкән, күрәсең. Умыртка баганасына зыян килгән, диләр. Аны хастаханәгә илттеләр. Операция ясарга тиешләр, — ди бакчачылык җәмгыятендә яшәүчеләр.

 

— Апага операция ясадылар. Табиблар хәлен уртача дип бәяли. Кечкенә улының хәле тотрыклы. Ул Республика балалар клиник хастаханәсендә. Мәрхүмнәрне соңгы юлга озаттык, — ди Аленаның энесе Павел.

 

Гаиләгә ярдәм итәргә теләүчеләр өчен Павелның телефон номеры: 8-917-285-62-97 (“Сбербанк” һәм “Тинькофф” карталарына беркетелгән, Полюбай Павел Александрович исемендә).