«Апуш» студиясе Камал театры спектакленә яңа сулыш өрде (ФОТО)

Казанның Ленин исемендәге мәдәният йортында иҗат итүче «Апуш» татар балалар театр студиясе тәүге спектаклен тәкъдим итте. Драматург, «Әкият» Татар Дәүләт курчак театрының сәнгать җитәкчесе, Татарстанның атказанган сәнгать эшлеклесе Илгиз Зәйниев әсәре буенча «Кечтүк» спектаклен 700гә якын кеше тамаша кылды.

Шунсын да билгеләп узыйк, И.Зәйниев әсәре буенча куелган «Кечтүкле уен» спектакле Г.Камал театрында 2012 елда сәхнәләштерелде. Анда «Апуш»лыларның остазы Миләүшә Шәйхетдинова Патшабикә ролен башкарды. Г.Камал театрыннан аермалы буларак, спектакльгә махсус җырлар язылды, кайбер сәхнә күренешләре өстәлде.

Спектакльнең режиссерлары – Татарстанның халык артисты, К.Тинчурин исемендәге Татар дәүләт драма һәм комедия театры артисты Зөлфия Вәлиева һәм Татарстанның атказанган артисты, Г.Камал исемендәге Татар дәүләт академия театры артисты Миләүшә Шәйхетдинова. Спектакльгә көйләрне композитор Радик Сәлимов һәм Зөлфия Вәлиева иҗат итте, музыка бизәлеше һәм аранжировка – Нияз Вәлиев, шигырьләр авторы – Резеда Гобәева. Сценограф, рәссам – Татарстанның Рәссамнар берлеге әгъзасы Анастасия Бузунеева. Тавыш режиссеры – Илья Лазарев. Ут куючы рәссам – Тәлгать Латыйпов.

Спектакльне Татарстан Республикасы Рәисенең Эчке сәясәт мәсьәләләре департаментының Милли сәясәтне гамәлгә ашыру идарәсе башлыгы Данил Мостафин, Ленин исемендәге мәдәни-ял комплексы директоры, Мәгариф, мәдәният һәм милли мәсьәләләр буенча даими комиссия рәисе Зөһрә Нигъмәтуллина, Казан шәһәре Башкарма комитеты җитәкчесе урынбасары Гүзәл Сәгыйтова, Казан ТЮЗ директоры Айгөл Горнышева, Россиянең халык артисты, Г.Камал исемендәге Татар дәүләт академия театры артисты, депутат, Татарстан Республикасы Дәүләт Советының Мәгариф, мәдәният, фән һәм милли мәсьәләләр комитеты әгъзасы Рамил Төхвәтуллин, Татарстан Министрлар Кабинеты Аппаратыннан кунаклар, Г.Камал, К.Тинчурин, Г.Кариев театры артистлары тамаша кылды.

«Илгиз Зәйниевның кайчандыр язылган пьесасын ничә елдан соң «Апуш» студиясе сәхнәләштерергә булды. Баксаң, татарның «Шомбае» кебек Кечтүге булган икән! Аннан бренд ясарга мөмкин. Менә безнең команда спектакль куйды, Кечтүкнең курчагын ясады. Киләчәктә мультфильм төшерелсен иде. Татар балаларының үз геройлары булсын иде. Без һәрвакыттагыча бик дулкынланабыз, чөнки балалар өчен дә, үзебез өчен дә бу бик мөһим көн. Премьераның датасы юктан гына сайланмады. 21 февраль –Халыкара туган телләр көне. Бүген туган телебез саклауга, яклауга мохтаҗ. Казан Мэриясе проектлары һәм шул исәптән «Апуш» балалар театр студиясе кебек башлангычларыбыз шушы олы максатка кечкенә генә өлеш», – дип ассызыклады Гүзәл Сәгыйтова.

Әлеге спектакль тормышның җитди уен булуын һәм бары тик кыюлар гына ахырга кадәр барып җиткәнен күрсәтә. Спектакль башында төп герой бар дөньяга үпкә саклый торган булса, юлында очраган сынаулар аның шәхесе формалашуга зур этәргеч ясый, тормышны яратучы, кыю, җитлеккән егеткә әйләнә.

Тамашачылар арасында Татарстанның атказанган артисты, Г.Камал исемендәге Татар дәүләт академия театры артисты Ришат Әхмәдуллин да бар иде. Ул 2012 елда «Кечтүкле уен» спектаклендә Шамил ролен уйнаган.

«Минем өчен әлеге спектакль үз-үзеңә хыянәт итмәү, ышанычыңны югалтмау һәм гомумән мәхәббәт турында. Балаларга «афәрин» диясем килә, бер сәгать бик тиз үтеп китте. Чын күңелдән кызыксынып карадым. Шамил аеруча ошады», – диде театр артисты.
Ленин исемендәге мәдәният йортына йөрүче шәкертләрне премьера белән котларга «Апуш»ның башка студия укучылары да килгән иде.
«Бу студиядә шөгыльләнгән һәр бала үзен бәхетле дип саный, чөнки монда эләгү – бик зур дәрәҗә. Безнең остазларыбыз бездән чын артистлар әзерли, сәхнәдә курыкмаска, кыю булырга һәм татар телен камил белергә өйрәтә. «Апуш» ул – зур тату гаилә», – дип фикерләрен җиткерделәр «Сәйдәш» мәдәният үзәгендә шөгыльләнүче шәкертләр Аяз Әгълиуллин һәм Рифнур Нәҗмиев.

Искәртеп узыйк, Ленин исемендәге мәдәният йортында эшләүче студиягә балалар сентябрьдән йөри, ә тамашага әзерлек ноябрьдә башланды. Премьерага махсус костюмнар тектерелде. Сәхнә һәм музыкаль бизәлеш – барысы да өр-яңадан тудырылды. Спектакльдә «Апуш»ның барлык 33 шәкерте катнашты. «Апуш»та укучыларга тәҗрибәле остазлар – актерлык осталыгы һәм сәхнә теле педагоглары – Зөлфия Вәлиева һәм Миләүшә Шәйхетдинова, Татарстанның атказанган артисты, «Казан» бию ансамбле солисты Ренат Мифтахов, эстрада-джаз вокалының югары категорияле укытучысы Ландыш Фәттахова белем бирә.

«10 елдан соң «Апуш» студиясе Камал театры спектаклен янәдән зур сәхнәгә чыгарды. 4 ай дәвамында гына шөгыльләнеп, балалар белән зур премьера куя алдык, без бик тырыштык. Балалар безнең йөзебезгә кызыллык китермәде һәм без алар белән бик горурланабыз. Татар театры яши, аның киләчәге бар», – дип хис-кичерешләре белән уртаклашты Зөлфия Вәлиева.

«Балалар өчен мондый студия турында без бик хыялланган идек. Екатеринбургтан Пермь театрына балалар фестиваленә килгән коллективны күреп, декорацияләренә, костюмнарына шаккатып кайткан идем. Татарстанда, Казаныбызда балалар өчен шундый театр булмавы бик борчый иде. Хәзер менә Аллага шөкер, 3 студиябез бар. Мондый мөмкинлек өчен Казан Мэриясенә зур рәхмәт», – диде Миләүшә Шәйхетдинова.
Спектакльне тамашачылар, килгән кунаклар бик җылы кабул итте, аягүрә алкышлады. Яшь артистларны әти-әниләре, дуслары, туганнары премьера белән котлады. Чара Гөлчәчәк һәм Илфак Хафизовлар сүзенә, Зөлфия Вәлиева көенә иҗат ителгән, «Апуш»ның 3 төркемен дә берләштергән «Туган тел» җыры белән тәмамланды.