Замирә Рәҗәпова: "Эй, язмыш, язмыш" - психологик яктан авыр тапшыру

 

– Бер елны ТНВда Айрат Арсланов турында тапшыру ясадык. Үзе турында утырып сөйләгән бер әңгәмәсе дә юк иде. “Эх, бер интервью булса иде!” – дип уйладым. Бервакыт Тинчурин театрында концертта Әлфия Авзалова Таһир Якупов турында матур истәлекләрен сөйләде. Шул вакытта: “Эх, Әлфия апаны утыртып сөйләтергә иде”, – дип уйлап куйдым. Шамил Бариев, Вафирә Гыйззәтуллина һәм башка шәхесләр турында материаллар җыя башладым. 7-8 ел узгач, фатирны җыештырганда, шушы папка килеп чыкты. Шулчак тапшыру төшерү идеясе туды. ТНВ каналы режиссеры, Татарстанның атказанган мәдәният хезмәткәре Наилә Сабитовага шалтыраттым. Ул – телевидениедәге зур терәгем. Наилә апа идеямне хуплап алды. Иң беренче тапшыруга Айгөл Бариеваны чакырдым. Бизнеста булгач, акчам бар иде. Беренче тапшыруны үз акчама төшердем. Айгөлгә шулкадәр рәхмәтлемен. Эфирга чыгуы икеле булган тапшыруга килеп, бөтен эч-серләрен сөйләде. Аның аягы җиңел булды, ТНВ тапшыруны кабул итте. Ул инде биш ел эфирга чыга.

 

 

– Кайвакыт кунаклар сорауларны алдан бирүемне сорый. Әмма андый гадәтем юк, чөнки бервакыт бер кунакка сорауларны алдан биргән идем, тапшыру ясалма килеп чыкты. Җавапларны ятлап килгәч, әңгәмә ихлас булмый. Геройларымның биографиясен өйрәнәм. Ә инде сораулар үзеннән-үзе килеп чыга. Алдан әзерләгән сораулар бирелми калырга да мөмкин, чөнки алар урынсыз була. Тапшыру җиңел түгел, психологик яктан авыр. Гадәттә, бер көндә өч-дүрт тапшыру төшерәбез. Андый көннәрдә өйгә арып-талып кайтам.