Вил Усманов: «Яшәргә кирәк бит – ризалаштым»

Баулы районының Хансөяр авылы егете беренче тапкыр Сабан туенда бил алышып карый. Җиңүче сөлгесен иңенә салып, авыл урамыннан, үзе әйтмешли, Берлинны алган кебек кайтканы әле дә исендә икән.

 

– 8 сыйныфны тәмамлап, Әлмәт физкультура техникумына укырга кердем. Нәкъ менә шул елдан профессиональ көрәш белән шөгыльләнә башладым. Илгизәр абый Димиев мәктәбен узган егет мин. Спорт залыннан чыкмадым да диярлек. Ярышлар җиткәндә бигрәк тә. Җиңүләре дә озак көттермәде, – ди җырчы.

 

Муса Җәлил исемендәге турнирда да өч мәртәбә бәхет елмая аңа. Кукмара, Балтач, Арча егетләре белән көндәшлек аеруча кискен булган.

 

– Ул турнирны оту безнең өчен зур дәрәҗә иде. Кайбер елларны башка ярышларга караганда да күбрәк һәм көчлерәк көрәшчеләр катнашты анда. Әмма без дә калышмаска тырыштык, – дип искә ала Вил Усманов.

 

Баулы егете берничә ел Теләче командасы өчен көрәшә. Сәнгать юлы нәкъ менә шул районга алып килә аны.

 

– Казанга укырга килгәч, Теләчедә эш тәкъдим иттеләр. Көрәшүемне белгәч, командаларына да дәштеләр. Көрәшчеләргә яхшы гына түлиләр иде алар. Яшәргә кирәк бит – ризалаштым. Әле данлыклы Теләче Сабан туена кайтып, батыр калганым да хәтердә.

 

Вил Усмановны Теләче генә түгел, төрле районнарга чакырып-чакырып карыйлар. Ләкин үзенең Казаннан китәсе килми.

 

– Казанда калырга көрәш ярдәм итте. Камил Исхаков мэр булганда, көрәш буенча шәһәр беренчелегенә килми калмый иде. Минем көрәшүемне ошаткан булып чыкты. Аның зур ярдәме белән, Казанда фатирлы булып, монда төпләнеп калдым. Кем белә бит, җырлап кына йөрсәм, язмышым бөтенләй башка борылыш алыр иде, – ди җырчы.

 

Көрәштән вакытында китә белергә кирәк дигән фикердә ул. Азарт һәм җиңү теләге көчле булганда, келәмне калдыру кыенрак икән шул.

 

– Көрәш чир кебек бит ул. Вокал буенча укытучым күпме тыеп карады – барыбер туктамадым. Көрәшнең җырчы буларак җитлегүемне шактый тоткарлаганын соң аңладым шул. Әмма бу әле үкенәм дигән сүз түгел. Табигатем буенча үҗәт мин. Көрәш менә шушы үҗәтлекне арттырды гына. Сәнгатьтә дә бик кирәк сыйфат ул. Аннан соң, сәнгать тә һәрдаим үз өстеңдә эшләүне таләп итә. Ул яктан бик охшаш алар, – ди Вил Усманов.