«Алтыным» дип дәшә иде. Татарстан һәм Россиянең халык артисты Фуат Мансуров исеме үзе яшәгән йортта мәңгеләштерелде

–  Чыннан да, бүген – тарихи вакыйга. Без моңа шактый озак килдек һәм, ниһаять, Фуат Шакирович яшәгән бинада аның истәлегенә мемориаль такта ачылды. Ул бар яктан да талантлы шәхес иде. Физика-математика юнәлеше буенча уку йортын тәмамлаганнан соң, ул күпмедер вакыт университетта укыткан. Тик соңыннан янәдән музыка сәнгатенә кайткан. Үз чорының иң якты һәм кызыклы кешеләрен үз янына җыйган һәм сәнгатебезне алга этәргән бөек шәхесебез, – диде тантанада мәдәният министры. – Фуат Мансуров  20 елдан артык Зур театрда дирижер булып эшләде, милли әсәрләребезне Муса Җәлил исемендәге опера һәм балет театрына алып керде, симфоник оркестрыбызга яңа тормыш, энергия бирде. Минемчә, милләтнең һәм халыкның бәхете мондый балалары булуда гына түгел, аларны хәтерләүдә дә. Шуңа күрә бүгеннән күренекле шәхесебезнең 100 еллыгын билгеләп үтүгә әзерлек эшләре башлана. Аның традицияләрен дәвам итүчеләр өчен яңа конкурс, премия, стипендияләр булыр дип ышанам. Ул музыка мәдәнияте яшәсен өчен бик күп эш башкарган. Әлеге эш алга таба да дәвам итәргә тиеш.

 

 

Намусы кушканча эшләде һәм үзеннән соң зур эз калдырды. Татарстан Композиторлар берлеге рәисе Рәшит Кәлимуллин музыкант турында шулай диде.

 

–  Мин аның белән шәхсән таныш булу бәхетенә ирештем. Ул Татарстан дәүләт симфоник оркестрының баш дирижеры булып эшләгәндә ярты ел саен Татарстан композиторларының әсәрләреннән торган концертлар оештырылды. Әсәрләрне сайлап алуга ул бик җентекләп карый иде, яшь композиторларга киңәшләрен бирә, үз төзәтмәләрен кертә, кирәк чакта тәнкыйтьли дә ала иде. Аның татар милли мәдәниятенә керткән өлеше бәяләп бетергесез, – диде ул.

 

«Таләпчән музыкант иде». Казан шәһәре Башкарма комитетының мәдәният идарәсе башлыгы Азат Абзалов Фуат Мансуровны шулай дип искә алды.

 

– Беренче чиратта үзенә, оркестр артистларына таләпчән булды. Репетицияләрдә, чыгышларында һәрвакыт әзерлекле иде. Фуат Мансуров –  барыбызга да үрнәк шәхес. Мәскәүдәге Зур театрда аның катнашында куелган «Патша кәләше» спектакле һаман да эталон булып санала. Һәм мондый мисаллар бик күп. Татарстанның дәүләтчелеген, республика гимнын булдыруга зур өлеш кертте. Ритмга, темпка аеруча игътибарлы иде. Татарстан, Казан бүгенге заманның шундый күренекле музыканты булу бәхетенә ия булган. Маэстрога лаеклы истәлек тактасы ясаган скульптор алдында баш иям, – диде Азат Абзалов.

 

Нәҗип Җиһанов исемендәге Казан дәүләт консерваториясе профессоры Ринат Халитов опера юнәлеше буенча профессиональ белгечләр әзерләүдә Фуат Мансуровның роле зур булуын искәртте.

 

– Һичшиксез, опера һәм симфоник оркестр дирижерлары конкурсы аның исемен йөртергә тиеш, – диде профессор.

 

Татарстанның атказанган артисты, Казан дәүләт консерваториясе профессоры Илсур Айнатуллов күренекле дирижер белән бергә эшләгән елларын искә алды.

 

– Мәскәүдә укып кайткач, 1988 елда ул мине оркестрга эшкә алды. Студентларга «алтыным» дип эндәшә иде. Без – татар егетләре белән татарча сөйләшергә яратты. Гастрольләр белән кая гына барсак та, укучылары аны рәхмәт әйтеп каршы ала иде. Фуат Шакирович полиглот та иде әле. Франциягә барсак – французча, Германиядә – немецча, инглизчә сөйләшә иде.

 

Фуат Мансуровның кызы Марина Мансурова әтисен шаян, шул ук вакытта җитди кеше иде, дип искә алды.

 

– Әти турында бик күп сөйләргә була. Аның чыдамлыгына һәм эшкә тугры булуына мин һәрвакыт гаҗәпләнеп һәм сокланып яшәдем. Юморны бик ярата иде. Әтигә багышлап  шундый истәлек куелуга мин бик рәхмәтле. Без аны хәтеребездә саклап яшәрбез дип ышанам, – диде ул.

Ләйсән Сафина

«Татар-информ»