Аю, Ленин һәм башкалар

Ил Президенты Дмитрий Медведев Сочидагы Олимпиаданың символларын сайлау нәтиҗәләре белән килешми. Аның әйтүенчә, җиңүчеләр гадел рәвештә билгеләнмәгән. Коммунистлар исә яңадан сайлау үткәрергә тәкъдим итә. Алар яңа символ – Ленин сынын сайламакчы.

Мәгълүм булганча, Сочидагы Олимпиаданың символлары өчәү булачак. Алар – Ак аю, Куян һәм Леопард. Әмма дүшәмбе көнне үк Дмитрий Медведев сайлау нәтиҗә­ләрен шик астына куйды. Аның әйтүенчә, Интернет һәм телевидение аша тавыш бирү барышында җиңүчеләр төрле булган. “Икенче юлы карар кабул иткәндә гаделрәк булырсыз дип өметләнәм”, – дигән ил башлыгы. Тавыш би­рү нәти­җәләре халыкта да шау-шу уятты. Берәүләр җиңүчеләр алдан ук билгеле булган, дип фаразласа, икен­челәр “чиле-пешле” символларга каршы. Сәнгать белгечләре әйтүенчә, Ак аю, Куян һәм Леопард тиешле дә­рә­җәдә эшләнеп бетмәгән. Өстәвенә аларны артык моңсу дип тапканнар.

Мәсьәләне хәл итү юлын “Петербург һәм Ленинград өлкәсе коммунистлары” тәкъ­дим иткән. Алар Олимпиада символларын яңадан сайларга кушкан. Ә менә тавыш би­рүдә талисманнар арасыннан төшеп калган Кыш Бабай урынына Ленин сынын керт­мәкчеләр. Алар әйтүенчә, Ленинның җиңү ихтималы да зур. Ул арада 1980 елда Мәскәүдә узган Олимпиа­даның символын уйлап табучы рәссам Виктор Чижиков Ак аюны уйлап табучыларны урлашуда гаепләгән. Аның әйтүенчә, Ак аю элеккеге символдан төсе белән генә аерыла. Чижиков судка гына мөрәҗәгать итә алмый. Чөнки рәссам Мәскәүдәге Олимпиада символына авторлык хокукы алмаган булган.