Интернетта танылган Хиффә әбиненең күршеләре: «Кызлар кебек ул, әле менә тау шуып кайтты»

Халык моны бик ярата. Иректән күреп, бу видеоны үзләренә дә алып куючылар табыла. Әнә шулай итеп, Ирекнең язылучылары, әбине яратучылар арта. Социаль челтәрләрдә әбине караучылар Иреккә бик рәхмәтле. Әмма егет үзе генә артык мактанмый, яхшы сүзләрне дә кабул итәргә ашыкмый. Әбекәйгә булышып яшәвен гадәти хәл дип аңлата.

 

– Максатым  язылучылар санын арттыру түгел иде. Хиффә әбине без гомер буе якын итәбез. Бабае моннан 20 еллар элек үлеп киткән аның. Әтиебез ташламады үзен. Гел ярдәм итеп торды. Аңа ияреп, без  дә әбигә кереп йөри башладык. Ире белән озак еллар бергә яшәсәләр дә, балалары булмаган, – ди Ирек. – Бер кайткач кердем дә, әби миңа тормышын сөйли башлады. Аны истәлеккә  яздырып аласым килде. Аннары интернетка куясы иттем. Әнә шулай әбине яраттылар. Кемдер аның җыйнак кына өен үз туган йортына охшата, кемгәдер ул әнисен, әбисен хәтерләтә икән.

 

Хиффә әбинең ире оста куллы булган. Нинди генә эшкә тотынса да, шуны ялт итеп эшләп куйган. Әбекәй дә зарланып, сукранып ята торганнардан түгел. Тугызынчы дистәне вакласа да, кызлар кебек әле. Йөрәге 18дә! «Үзен  карап кына яши», – ди Ирек. Хиффә әби табиб кушкан даруны тиешле вакытында эчә. Кичтән пешергән ашны икенче көнгә кайнатып чыгармыйча ашамаска киңәш итә. Баксаң, җылытып кына алсаң, андый ризык ашказанына ярамый икән. Хиффә әби җәй буе үлән дә җыя, ди. Шуларны эчеп, тыныч кына яшәп ята. Күңеле көр үзенең. Әле менә күптән түгел тау шуарга барганнар. Әбекәйнең чана шуасы килгән. «Балачактагы кебек таудан шуарга иде», – ди икән. Ирек аның бу теләгенә каршы килмәгән.

 

– Хиффә әбинең холкын ятлап бетердем инде мин. «Әйдә тау шуабызмы?» – диюгә, ризалашты. Күзләрендә ут яна. Яше генә зур. Үзе әле дә яшьлегендә ул. Гәүдәсе җиңел, тормышның ямен тоеп яши. Тау шуганда курыктым да. Тюбингка утыртып төшереп җибәргәч, барысын да уйлыйсың. Видеода бөтенесен дә күрсәтеп бетереп булмый. Агачка бәрелә күрмәсен, дип тә кайгырдык. Яше дә бар бит инде, сөякләре сынмаса ярар иде, дип  кот очты. Әмма теләгенә каршы килә алмадык, – ди Ирек.

 

Илдә мобилизация башлангач, Ирек интернетка күңелле видеолар куймыйча тора. «Уңайсызландым», – ди. Әмма шул вакытта Хиффә әбине югалтучылар күп була. Иреккә хатлар килә. Иреккә генә түгел, Хиффә әбинең үзенә дә: «Кая югалдың?» –  диючеләр була. Баксаң, бер авылдашы белән Актанышка барган икән. Шунда 3–4 кеше танып алып: «Нигә сине интернетка куймый башладылар?» – дигән. Хиффә әби Иреккә  шуларны кайтып әйткән. Әби фотога да, видеога да төшергәнгә ияләшеп беткән инде. Камераны тотып килә башлауга, тиз генә кием-салымын рәтләп, елмаеп җибәрә икән.

 

– Хиффә апаны бик яратабыз. Күрше генә түгел инде ул, бик якын туганыбызга әйләнде. Без аңа, ул безгә бик ияләнде. Кайтканны белүгә, тәм-томнарын кыстырып кереп җитә. Бәйрәмгә дә күчтәнәчләр бирә. Кибеттән үзенә ни алса, безгә шуны кертә. Аның күңеле изге. Бөтен кешедә Хиффә әби кебек була алмый, – ди Ирек. – Хиффә әбине хәзер дөньяның төрле почмакларында  беләләр.  Әстерхан якларыннан, Владикавказдан  аңа дип посылкалар җибәрәләр. Туган нигезе беткән, кайтыр авылы булмаган кешеләр, Хиффә әбинең йортын, үзен күрсәткәч, аңа атап  җылы сүзләр язалар. Кемнедер балачагына, яшьлегенә кайтара алганыбызга бик сөенәбез.

 

Ирекнең генә түгел, аның әти-әнисенең дә игелекле кешеләр икәнен аңладык инде. Алар олы кешене матур яшәтергә тырыша. Сәламәтлеген дә кайгырталар. Баксаң, Хиффә әбинең күзенә операция ясатырга кирәк икән.

 

– Коронавирус башланганчы, бер күзенә операция ясатып кала алдык. Чир таралгач, икенчесенә ясатырга өлгермәдек. Менә хәзер шул күзенә операция кирәк. Актанышка барып чиратка да язылып кайткан идек. Әмма никтер чират селкенми дә. Әллә олы кеше дип артка калдыралар инде? Бер күзе начар күргәч, икенчесенә авырлык килә икән. Шуңа да операцияне тизләтергә иде, – ди Ирек.

 

Без исә Хиффә әбинең чиратын белешергә сүз бирдек.