10.01.2023 Медицина

Дүрт айлык бала үлеменә табиблар гаеплеме?

Стәрлетамакта 4 айлык баланың үлеме факты буенча җинаять эше кузгаталар. Русия Тикшерү комитеты рәисе Александр Бастрыкин мондый йөкләмәне Башкортстан буенча Тикшерү комитеты җитәкчесе вазыйфаларын башкаручы Ильяс Мәсәлимовка бирде.

Федераль ведомство матбугат хезмәте мәгълүматлары буенча, Тикшерү комитеты башлыгы зыян күрүченең дәлилләрен һәрьяклап өйрәнергә, кирәкле экспертизалар үткәрергә кушты. Тикшерү барышы һәм нәтиҗәләре ведомствоның үзәк аппаратында контрольгә алынды.

Элегрәк социаль челтәрләрдә һәм киңкүләм мәгълүмат чараларында медицина учреждениеләренә сәламәтлек торышының начараюына карата дәгъвалар белән берничә тапкыр мөрәҗәгать итүләренә карамастан, балага кирәкле ярдәм күрсәтелмәгән дип хәбәр ителгән иде.

Фаҗигале очрак 4 гыйнварда булды. Башкортстан Сәламәтлек саклау министрлыгы матбугат хезмәте мәгълүматлары буенча, бала ашыгыч ярдәм линиясе буенча Стәрлетамак шәһәренең 1нче балалар хирургиясенең кабул итү бүлегенә озатылган. Дежур табиблар баланың Республика клиник хастаханәсенең балалар хирургларында исәптә торуын, планлы оператив дәвалауга әзерләнүен ачыклаган.

Дежур хирург тарафыннан бала тиешенчә тикшерелмәгән. Медицина манипуляциясеннән соң баланың борчылуы тукталган һәм ул өенә кайтарылган. 4 гыйнварда төнлә ата-аналар кабат ашыгыч ярдәм чакырта, баланы фельдшер тикшерә, хастаханәгә салу өчен ашыгыч күрсәткечләр ачыкланмый.

"Шул ук көнне иртә белән ата-аналар баланы балалар хирургиясе бүлегенең кабул итү бүлегенә мөстәкыйль китерделәр. Хастаханәнең кабул итү бүлмәсендә бала табиблар тарафыннан тикшерелде, барлык кирәкле анализлар алынды, инструменталь тикшерүләр үткәрелде. Кабул итү бүлмәсендә баланың хәле кискен начарланды. Ул аңын югалтты һәм реанимация бүлегенә ашыгыч рәвештә кабул ителде, анда күкрәк читлеге рентгенографиясе нәтиҗәләре буенча беренче тапкыр йөрәк-кан тамырлары системасы ягыннан өзлегүләр ачыкланды. 55 минут дәвамында үткәрелгән барлык реанимация чаралары, кызганычка каршы, нәтиҗә бирмәде", - дип аңлаталар Сәламәтлек саклау министрлыгында булган хәлләрне.

Ведомство вәкиле баланың ата-анасының һәм якыннарының кайгысын уртаклаша, шулай ук бу очракта Сәламәтлек саклау министрлыгы медицина ярдәмен күрсәтүнең барлык этапларын тикшерә дип белдерде.

фото: пиксабай

Кызыл таң

Автор:Резеда Галикәева

---
Матбугат.ру
№ --- | 10.01.2023