Илдар Гыйльметдинов: “Җанисәптә милләтен күрсәтмәүчеләр ике тапкырга артачак”

Ә моны берничек тә булдырмаска кирәк. Россия дәүләт милли сәяси стратегиясен гамәлгә ашыруның беренче унъеллыгы нәтиҗәләренә багышланган матбугат очрашуында Дәүләт Думасының милләтләр эшләре буенча комитет рәисенең беренче урынбасары Илдар Гыйльметдинов шулай дип белдерде. 

 

Спикер билгеләп узганча, декабрь аенда Россия дәүләт милли сәяси стратегиясен кабул итүгә ун ел була. 

– Моннан унике-унөч еллар элек, башкарма хакимият органнарында милли сәясәт темасы турында фикер алыша башлаганда, бер генә документ та юк иде. Стратегияне кабул иткәнче, төбәкләр үсеше министрлыгына җыелып, илдә милли сәясәт системасын һәм аны төбәкләрдә гамәлгә ашыру механизмнарын булдыру турында сөйләшә идек. Ун ел эчендә аның норматив-хокукый базасы да, инструментлары да, аның өчен җавап бирә торган структура да барлыкка килде, – дип искә алды ул елларны Илдар Гыйльметдинов.  

 

Әлеге мөһим документ ярдәмендә Россия Президенты каршында Милләтара мөнәсәбәтләр буенча совет төзелеп, аның утырышлары нәтиҗәләре буенча дәүләт җитәкчесенең 200дән артык йөкләмәсе бирелгән. Советның үз президиумы бар. Аның әгъзалары ел саен Президент белән очрашып, стратегияне гамәл ашыру белән бәйле проблемалар турында сөйләшә. 

 

Илдар Гыйльметдинов билгеләп узганча, милләтләр эшләре буенча федераль агентлык та стратегияне гамәлгә ашыру кысаларында барлыкка килгән. 

–  Мин башта ук башкарма хакимият каршында шундый институт булуын таләп иткән кешеләрнең берсе идем, хәтта төбәкләрдә структур бүлекчәләре булган министрлык барлыкка килүен теләгән идем. Соңрак федераль хөкүмәт тарафыннан "Дәүләт милли сәясәтен гамәлгә ашыру" дәүләт программасы расланды. Аның финанславы нәтиҗәсендә илдә милли-мәдәни автономияләр барлыкка килде, – дип, Татарстанны мисалга китерде ул. – Татарстандагы Халыклар ассамблеясы иң зурысы һәм көчлесе. Халыклар дуслыгы йорты да башка төбәкләргә үрнәк итеп куярлык. Күп кенә төбәкләр стратегияне гамәлгә ашырганда безгә килеп өйрәнеп киттеләр. 

 

Спикер үзен борчыган мәсьәләне дә җиткерде. Ул җанисәп нәтиҗәләре белән бәйле.

–  Декабрьдә үк билгеле булыр дигән идек. Әмма ул әлегә әзер түгел. Аны киләсе елга күчерделәр. Шулай да билгеле бер мәгълүмат бар һәм ул мине сагаерга мәҗбүр итте. Милләтләрен күрсәтмәүчеләрнең саны бу юлы ике-өч тапкырга артыграк булачак. 2010 елда ул күрсәткеч 5,5 миллион булган. Аның сәбәбе пандемия белән бәйле булырга мөмкин. Халык ул вакытта җанисәп алучылар белән ишек аша гына сөйләште яки бөтенләй ишек ачмады, шунан соң кайбер мәгълүматларны йорт кенәгәсеннән генә алган булырга мөмкиннәр, – диде ул.