|
|
Бүген кемнәр туган
|
|
Архив
|
17.11.2022 Могҗиза
Кызның солдатларга язган хаты әтисенә барып эләккән
Кузбассның Новокузнецк районы Безруково авылыннан Александр белән дә шундый гаҗәп хәл булган. Октябрь урталарында ул өлешчә мобилизациягә эләккән һәм хәрби әзерлек үтү урынына юлланган. Кузбасстан киткәндә Александрга, барлык хәрбиләргә тапшырган кебек үк, бүләк бирәләр. Автобуска утыргач ул бүләккә күз сала. Анда җылы оекбашлар була. Оекбаш эчендә кәгазь тавышы ишетелә. Кулын тыгып караса – анда хат. Русия хәрбиләренә Кузбасс мәктәпләре укучылары язган хатларның берсе була ул. Конверт тышына аның туган авылы һәм ун яшьлек кызы укыган сыйныф саны язылганын күреп, ирнең күзләре маңгаена менә. Ә хатны ачкач, ул бөтенләй шакката – хат язучылар арасында аның кызы Арина да була. Ирнең күзенә яшьләр килә... Ул бу хакта гаиләсенә сөйли. Бак дисәң, Арина “Солдатка хат” акциясендә катнаша. Өченче сыйныфта укыган кыз солдатларга куәтләү сүзләре генә язып калмый, ә матур рәсемнәр дә төшерә. Укучыларның хатларын солдатларга җибәрәләр. Бу сентябрь ахырында була, ә ике атнадан әтисенә повестка килә. Һәм бар Кемерово өлкәсеннән җыелган йөзләгән хатлар арасыннан кызының хаты нәкъ әтисенә барып ирешүе – таң калырлык могҗиза! Бу хат, йөзләгән километр үтеп, бер ай үз хуҗасын көтеп ятканнан соң иң кадерле кулларга килеп эләгә...
“Бу юкка түгелдер, ул югарыдан килгән бер күренеш. Моны яхшылык билгесе дип ышанам. Димәк, Александр исән-имин әйләнеп кайтачак. Без аны көтәбез”, – дигән хатыны.
Кыз әтисе белән горурлана. Һәм аның хәрби әзерлек үзәгеннән җибәргән бүләге – металл жетон белән аерылмый. Ул, әтисенең мәхәббәте һәрчак йөрәген җылытып торсын өчен, жетоннан муенса ясап тагарга хыяллана.
Фото: variant.kurtub.ru
Язгөл САФИНА |
Иң күп укылган
|