“Ир-егет булу җиңелме?”

Бу сорауга җавап алырга теләүчеләрне 20нче февраль көнне 13 сәгать 30 минутта “Мәдәният дөньясында” тапшыруының Ватанны саклаучылар көненә багышланган махсус чыгарылышын карарга чакырабыз.

Бер сәгатьлек бәйрәм тамашасының сценарий авторы - Замирә Гәрәева. Ул проектның барлык серләрен ачмыйча гына аның бик тә кызыклы булачагын әйтте. Биредә ир-егетләрнең көндәлек эшләрен хатын-кызлар үзара ярыша-ярыша үтәргә җыена.

Бәйгедә Г.Камал театры актрисалары: Ләйсән Рәхимова, Люция Хәмит, “Зө-Ләй-Лә” төркеме солисткасы Зөлфия Вәлиева; җырчы Илсөя Бәдретдинова, “Яңа Гасыр” радиосы алып баручысы Шәмсия Җиһангирова катнаша. Аларга шөреп бору кебек көч сораган бәйгеләр белән бергә телевизордан аерыла алмыйча матч карарга да туры киләчәк. Ә менә шәхси зачетта кем җиңүен тапшыруны карап белергә мөмкин. Кызларның зирәклеген, тапкырлыгын, шаяра белү дәрәҗәсен һәм физик ныклыгын хөкемдарлар бәяләячәк. Жюри составында тапшыруның төп алып баручылары – Гүзәл Сәгыйтова һәм Искәндәр Сираҗи белән бергә татар театры һәм татар эстрадасында танылган Фәнис Җиһанша, Олег Фазылҗан, Равил Галиев, Айрат Хәмитов, Фәнис Кәлимуллин кебек артистларны күрергә мөмкин. Ярышны Замирә Гәрәева алып бара.

Тапшыруның режиссеры - “Татарстан – Яңа Гасыр” каналында эфирга чыккан күп кенә күңелле проектларга нигез салучы Наилә Сәбитова. Идея авторы - Миләүшә Айтуганова.

“Мәдәният дөньясында” тапшыруының махсус чыгарылышын карамыйча калмагыз! Шәп булачак! 20нче февраль 13:30. Кабатлау - 23нче февраль 19:00.