Татарстанның иң көчле көрәш командасын ачыкладылар (РАЙОННАР ИСЕМЛЕГЕ)

Көрәш дөньясында үзенә күрә бер яңалыкка әверелгән әлеге ярышның беренчесе узган ел оештырылган иде. Моңа кадәр күп еллар дәвамында уздырылган Авыл хуҗалыгы министрлыгы бәйгесенең урынын алды ул. Урып-җыю эшләре тәмамлангач, авыл егетләрен Казанга җыя иде министрлык ярышы. Әлеге турнирда көрәшчеләр үз категорияләрендә шәхси җиңү һәм командалар арасында беренче урынга чыгу өчен бил алышса, Федерация Кубогында уртак уңыш мөһимрәк. Хәтта үз ишләрең арасында бер мәртәбә отмыйча да, җиңүчеләр арасына керергә мөмкин. Иптәшләрең синең өчен дә тырышса, әлбәттә. Кыскасы, бердәмлек сорала. Җиде үлчәү авырлыгында оештырылган ярышта уңышка ирешү өчен командадагы ким дигәндә дүрт кешенең көндәшеннән өстен чыгуы кирәк. Эшнең ни белән бетәсе әле соңгы алышлар тәмамланганчы ук ачыкланса, ахырга таба бил алышып тормаска да мөмкин. Шимбә көнне узган бәйгедә андый хәлләр дә булды.

 

Ярымфиналда Әлмәт белән Түбән Каманы отып, Федерация Кубогы бәйгесенең финалына Лаеш һәм Теләче командалары чыкты. Төгәлрәк әйтсәк, җыелма командалары. Теләче өчен хәзер Рәмис Хәйруллин, Мөхәммәд Хәбибуллин, Артур Зөлкәрнәев, Ренас Кәлимуллин, Айгиз Зәйнетдинов, Раил Нургалиев, Фәрхәт Фәйзуллин бил алыша. Яртысыннан артыгы тумышы белән башка район, хәтта төбәк егетләре. Лаешның беренче командасында исә барысы да читтән килгән көрәшчеләр: Алексей Абрамов (Алексеевск), Илназ Димиев (Мамадыш), Динар Кәримуллин (Теләче), Раил Сәлахетдинов (Киров өлкәсе), Ранис Галимуллин (Теләче), Муса Галләмов (Мари Иле), Радик Сәлахов (Зәй). Лаеш өчен халыкара класслы 6 спорт остасы тир түкте әлеге бәйгедә! Яхшы күренешме бу, әллә юкмы – һәркемнең үз фикере. Көрәшчеләргә келәм генә түгел, эш һәм аш та кирәк. Ләкин аларның бер командадан икенчесенә күчеп йөрүенә гади тамашачы гына түгел, хәтта хөкемдарлар да өлгерә алмый.

 

Соңгы елларның иң көчле көрәшчеләреннән саналган Раил Нургалиев, Муса Галләмов һәм Радик Сәлаховның бил алышуы һәр бәйгенең бизәгенә әверелә. Бу юлы тамашачыга андый бәхет тәтемәде. Муса белән Радик хәзер бер командада, төрле категорияләрдә көрәшәләр. Раил белән Муса исә финалда бил алышырга тиеш иде. «Травмасы бар аның», – диде Раил, авызын ерып. Шулай итеп, Нургалиев көрәшеп тә тормыйча, келәмнән җиңүче булып чыгып китте. Әмма батырлар исемлегенә керә алмады. Чөнки алдагы биш алышта Лаеш командасы 4:1 исәбе белән алга чыккан иде. Хәлиткеч очрашуда Ранис Галимуллин Айгиз Зәйнетдиновны отуга ук Федерация Кубогының быелгы иясе ачыкланды. Өченче урынны Әлмәт командасына бирделәр. Бирделәр, чөнки Түбән Кама егетләре келәмгә чыкса да, көрәшеп тормады. Мондый күренеш тамашачыга ошамады, билгеле, аның каравы фото һәм видеога төшерүчеләр рәхәтләнде. Җиңгән як «чиста алым»нарны шәп ясады чөнки.

 

…18–19 ноябрьдә көрәшчеләр Татарстан чемпионатына җыела. Монысында шәхси җиңү өчен дә көрәшәчәкләр. Аңа кадәр исә Әлмәттә яшь егетләр арасында бәйге булачак. 29 октябрьдә алар нефтьчеләр башкаласына җыелып, татарның танылган батыры Ильяс Галимов истәлегенә бил алышачак.

 

Лаеш

Теләче

Әлмәт

Түбән Кама

Теләче 2

Чаллы

Зәй

Биектау

Балтач

Кукмара

Фото: «Татар-информ»